హైదరాబాద్:
తెలంగాణలోని మాజీ సైనికుల సంక్షేమం కోసం ప్రత్యేకంగా ‘మాజీ సైనిక కార్పొరేషన్‌’ ఏర్పాటు చేసే దిశగా రాష్ట్ర ప్రభుత్వం కీలక నిర్ణయం తీసుకుంది. బుధవారం సచివాలయంలో సైనిక సంక్షేమ శాఖ డైరెక్టర్ బ్రిగేడియర్ ఎన్.ఆర్. బాబు ముఖ్యమంత్రితో భేటీ అయ్యారు. ఈ సందర్భంగా రాష్ట్రంలో మాజీ సైనికులు ఎదుర్కొంటున్న సమస్యలు, వారి సంక్షేమానికి చేపట్టాల్సిన చర్యలపై సుదీర్ఘంగా చర్చించారు.

అధ్యయనం చేయండి: అధికారులకు ఆదేశం
రాష్ట్రంలో మాజీ సైనిక కార్పొరేషన్ ఏర్పాటు చేయాలన్న ప్రతిపాదనకు ముఖ్యమంత్రి సానుకూలంగా స్పందించారు. ఇతర రాష్ట్రాల్లో ఇటువంటి కార్పొరేషన్లు ఎలా పనిచేస్తున్నాయి? వాటి విధివిధానాలు ఏమిటి? అనే అంశాలను సమగ్రంగా సేకరించాలని ముఖ్యమంత్రి కార్యాలయ (CMO) అధికారులను ఆదేశించారు. క్షేత్రస్థాయిలో ఉన్న నమూనాలను పరిశీలించి, వీలైనంత త్వరగా సమగ్ర నివేదికతో మరో సమావేశం ఏర్పాటు చేయాలని సూచించారు.

కీలక కమిటీల పునరుద్ధరణ
చాలా కాలంగా పెండింగ్‌లో ఉన్న కీలక బోర్డుల నిర్వహణపై బ్రిగేడియర్ బాబు ముఖ్యమంత్రి దృష్టికి తీసుకెళ్లారు.
 
రాజ్య సైనిక బోర్డు: ముఖ్యమంత్రి అధ్యక్షుడిగా ఉన్న ఈ బోర్డు సమావేశాన్ని త్వరలోనే నిర్వహిస్తామని హామీ ఇచ్చారు.
 
స్టేట్ మేనేజింగ్ కమిటీ: గవర్నర్ అధ్యక్షతన ఉండాల్సిన ఈ కమిటీ నియామక ఉత్తర్వులను త్వరితగతిన జారీ చేయాలని ప్రభుత్వం భావిస్తోంది. దీనికి సంబంధించిన ఫైళ్లను తక్షణమే పరిష్కరించాలని అధికారులకు సూచించారు.