హైదరాబాద్:

దేశవ్యాప్తంగా లక్షలాది మంది సామాన్య, మధ్యతరగతి విద్యార్థుల వైద్య విద్య కలలను ‘ప్రైవేట్ మాఫియా’ నిలువునా ముంచేస్తోంది. ప్రతిష్టాత్మక నీట్ (NEET UG-2026) పరీక్షను అక్రమార్కులు అంగడి సరుకుగా మార్చేశారు. టెక్నాలజీ అండతో ‘వాట్సాప్’ గ్రూపుల ద్వారా ప్రశ్నపత్రాలను చేరవేస్తూ కోట్ల రూపాయల దందాకు తెరలేపారు. ఈ వ్యవహారంలో 15 మందిని అరెస్ట్ చేసిన పోలీసులు, దీని వెనుక భారీ నెట్‌వర్క్ ఉన్నట్లు గుర్తించడం కలకలం రేపుతోంది.

అర్ధరాత్రి దందా.. అరకోటి బేరం!*
పరీక్ష నిర్వహణలో ఎన్ని ‘జాగ్రత్తలు’ తీసుకున్నా అక్రమార్కులు పైచేయి సాధిస్తూనే ఉన్నారు. ప్రైవేట్ మాఫియా పేరుతో సాగుతున్న ఈ ముఠా, ఒక్కో అభ్యర్థి నుంచి రూ. 60 లక్షల వరకు వసూలు చేసినట్లు సమాచారం. ‘ప్రైవేట్ మాఫియా’ అనే వాట్సాప్ గ్రూపుల ద్వారా ప్రశ్నాపత్రాలను సర్క్యులేట్ చేస్తూ, పరీక్షా వ్యవస్థలోని లొసుగులను సొమ్ము చేసుకుంటున్నారు. అరెస్ట్ అయిన వారిలో కీలక సూత్రధారులతో పాటు ఒక వైద్య విద్యార్థి కూడా ఉండటం గమనార్హం.

ఈ కుంభకోణంపై *TSTCA అధ్యక్షులు ఎ.సంతోష్ కుమార్ ప్రభుత్వ తీరుపై నిప్పులు చెరిగారు. అధికార యంత్రాంగం వైఫల్యాన్ని ఆయన ఘాటుగా విమర్శించారు:
 
ఏమైంది ఆ పకడ్బందీ?: "ఏఐ (AI) కెమెరాలు, 5జీ జామర్లు, బహుళ అంచెల భద్రత అని ప్రగల్భాలు పలికిన ఎన్.టి.ఎ (NTA) ఇప్పుడు ఏ ముఖం పెట్టుకుని సమాధానం చెబుతుంది? సాంకేతికత పెరిగింది కేవలం నిఘా కోసమేనా లేక లీకేజీల కోసమా?" అని సంతోష్ కుమార్ ప్రశ్నించారు.

 కఠిన చర్యలకు డిమాండ్: "కేవలం 15 మందిని జైలుకు పంపితే ఈ మురికి వదలదు. ఈ మాఫియా వెనుక ఉన్న రాజకీయ, అధికారిక ‘పెద్దల’ జాతకాలు బయటపెట్టాలి. విద్యార్థుల భవిష్యత్తుతో చెలగాటమాడితే సహించేది లేదు. తక్షణమే నిష్పక్షపాత విచారణ జరిపి, విద్యార్థులకు న్యాయం చేయాలి" అని ఆయన డిమాండ్ చేశారు.

ఆందోళనలో 22 లక్షల కుటుంబాలు
మరోవైపు ఎన్.టి.ఎ (NTA) ఇప్పటికీ ‘అంతా సవ్యమే’ అని బుకాయిస్తుండటంపై సర్వత్రా విమర్శలు వ్యక్తమవుతున్నాయి. పరీక్షా కేంద్రాల దగ్గర హైటెక్ నిఘా ఉన్నా, పేపర్ ఎలా బయటకు వచ్చిందనేది అంతుచిక్కని ప్రశ్నగా మారింది. దాదాపు 22 లక్షల మంది విద్యార్థుల భవితవ్యం ఇప్పుడు త్రిశంకు స్వర్గంలో పడింది. ప్రభుత్వం కఠిన నిర్ణయం తీసుకోకుంటే పరీక్షా వ్యవస్థపై ప్రజలకు నమ్మకం పోయే ప్రమాదం ఉందని విద్యావేత్తలు హెచ్చరిస్తున్నారు.