*హైదరాబాద్:

ఇటీవల కురిసిన తొలి వర్షానికే ఐటీ కారిడార్‌తో పాటు నగరంలోని పలు ప్రాంతాలు జలమయమవడాన్ని తీవ్రంగా పరిగణించిన హైడ్రా కమిషనర్ ఏవీ రంగనాథ్ గురువారం క్షేత్రస్థాయిలో పర్యటించారు. వరద ముంచెత్తిన మాదాపూర్, కొండాపూర్, మియాపూర్ తదితర ప్రాంతాల్లో పర్యటించిన ఆయన.. నీరు నిలిచిపోవడానికి గల సాంకేతిక, సహజ కారణాలను స్వయంగా పరిశీలించారు. ఈ పర్యటనలో హైడ్రా అదనపు సంచాలకులు వర్ల రామయ్యతో పాటు అటవీ శాఖ అధికారులు, అగ్నిమాపక సిబ్బంది, వివిధ ప్రభుత్వ శాఖల ఉన్నతాధికారులు పాల్గొన్నారు.

*బాక్స్ డ్రైన్ల మూసివేతతోనే ముంపు..
కొండాపూర్ నుంచి మొండికుంట వైపు వెళ్లాల్సిన వరద నీరు మీనాక్షి టవర్స్ సమీపంలో నిలిచిపోవడానికి ప్రధాన కారణం అక్కడి కాంక్రీట్ బాక్స్ డ్రైన్ల (పెద్ద వరద కాలువల)పై పూర్తిగా స్లాబ్ వేసి మూసివేయడమేనని అధికారులు గుర్తించారు. దీనివల్ల లోపల పేరుకుపోయిన పూడికను తీయడానికి వీల్లేకుండా పోయింది. దీనికితోడు మీనాక్షి టవర్స్ వద్దకు వచ్చేసరికి వరద కాలువ మరింత కుంచించుకుపోయింది. దీనిపై స్పందించిన కమిషనర్.. వెంటనే సదరు స్లాబులను తెరిపించి, పూడికను పూర్తిగా తొలగించాలని, అవసరమైతే కాలువను విస్తరించాలని ఆదేశించారు.

*రెండు రోజుల్లో పనులు పూర్తి కావాలి!
"వరద నీటి ప్రవాహానికి ఆటంకం కలిగిస్తున్న ప్రతీ అడ్డంకిని తొలగించాలి. ఎక్కడికక్కడ పూడికతీత పనులను పూర్తి చేసి, రాబోయే వర్షాలకు నగర ప్రజలకు ఇబ్బంది కలగకుండా చూడాలి."
        *హైడ్రా కమిషనర్ ఆదేశం

 మియాపూర్ లో ఆక్రమణలు:
మియాపూర్ పరిధిలోని గురునాథ్ చెరువుకు వెళ్లే వరద కాలువలు ఆక్రమణలకు గురికావడంతోనే జేపీ నగర్ చౌరస్తా, లక్కీ హోటల్ పరిసరాలు నీట మునిగాయి. ప్రిమార్క్ సుంకృతి అపార్ట్‌మెంట్ సమీపంలో కాలువను పూర్తిగా మూసివేయడం వల్లే ఈ దుస్థితి దాపురించింది. దీనికి తోడు, ఇటీవల కొత్తగా నిర్మించిన రహదారుల వల్ల వర్షపు నీరు కాలువల్లోకి వెళ్లే మార్గాలు మూసుకుపోయాయి.
నగరంలోని అన్ని వరద కాలువలను తక్షణమే పునరుద్ధరించి, ఆక్రమణలను తొలగించేందుకు హైడ్రా సమర శంఖం పూరించింది. పనుల్లో నిర్లక్ష్యం వహిస్తే కఠిన చర్యలు ఉంటాయని కమిషనర్ హెచ్చరించారు.