హైదరాబాద్:
నగర పరిశుభ్రత కోసం ఎండను సైతం లెక్కచేయక శ్రమిస్తున్న పారిశుధ్య కార్మికుల సేవలు వెలకట్టలేనివని జీహెచ్‌ఎంసీ కమిషనర్ ఆర్.వి. కర్ణన్ కొనియాడారు. గురువారం యూసుఫ్‌గూడ సర్కిల్‌లో పర్యటించిన ఆయన, క్షేత్రస్థాయిలో కొనసాగుతున్న పారిశుధ్య పనులను స్వయంగా పర్యవేక్షించారు. ఈ సందర్భంగా కార్మికులతో ముఖాముఖి మాట్లాడి వారి యోగక్షేమాలను అడిగి తెలుసుకున్నారు.

అభినందనీయం.. జైప్రకాష్ నగర్ వెల్ఫేర్ అసోసియేషన్ సేవలు
తీవ్రమైన ఎండల నేపథ్యంలో పారిశుధ్య కార్మికుల పట్ల జైప్రకాష్ నగర్ వెల్ఫేర్ అసోసియేషన్ చూపుతున్న చొరవను కమిషనర్ ప్రత్యేకంగా అభినందించారు. కార్మికులకు ఉదారంగా అల్పాహారం ఏర్పాటు చేయడం వారి సామాజిక బాధ్యతకు నిదర్శనమని పేర్కొన్నారు. అనంతరం అసోసియేషన్ సభ్యులు, కార్మికులతో కలిసి ఆయన అల్పాహారం తీసుకున్నారు.

స్వచ్ఛ భారత్ మిషన్‌లో భాగస్వాములు కావాలి
ఈ సందర్భంగా కమిషనర్ మాట్లాడుతూ.. స్వచ్ఛ భారత్ మిషన్ (SBM) కింద చేపట్టే జనాభా గణన - స్వీయ గణన ప్రక్రియలో నగరవాసులు ఉత్సాహంగా పాల్గొనాలని కోరారు.

సామాజిక బాధ్యతతోనే స్వచ్ఛ నగరం
పరిశుభ్రమైన, ఆరోగ్యకరమైన హైదరాబాద్ నిర్మాణంలో సామాజిక భాగస్వామ్యం కీలకమని కమిషనర్ స్పష్టం చేశారు. కార్మికుల సంక్షేమం పట్ల ప్రతి ఒక్కరూ సానుకూల దృక్పథంతో ఉండాలని పిలుపునిచ్చారు. ఈ కార్యక్రమంలో డిప్యూటీ కమిషనర్ ఎ. సురేష్, ఎస్‌బీఎం డీవైఈఈ వి. శ్రీనివాస్ తదితరులు పాల్గొన్నారు.