హైదరాబాద్:

నిన్నటి వరకు కదలలేని అడుగులకు స్థిరత్వం లభించింది.. అచేతనంగా ఉన్న చేతులకు ప్రాణం వచ్చింది. నాంపల్లి ఎగ్జిబిషన్ గ్రౌండ్స్ ఆదివారం ఒక అపురూప మానవతా యజ్ఞానికి వేదికైంది. నారాయణ్ సేవా సంస్థాన్ ఆధ్వర్యంలో నిర్వహించిన ఉచిత కృత్రిమ అవయవాల అమరిక శిబిరం వందలాది మంది దివ్యాంగుల జీవితాల్లో కొత్త ఆశలు నింపింది. మేక్ ఎ ఛేంజ్ ఫౌండేషన్ (యూకే), విలెస్‌డెన్ శ్రీ స్వామినారాయణ ఆలయం సహకారంతో జరిగిన ఈ కార్యక్రమంలో మొత్తం 745 మంది లబ్ధిదారులకు 815 కృత్రిమ అవయవాలు, కాలిపర్లను అందజేశారు.

మానవతా విజయానికి ప్రతీక: గవర్నర్:
శిబిరాన్ని ప్రారంభించిన గవర్నర్ శివప్రతాప్ శుక్లా ఈ కార్యక్రమాన్ని ‘మానవతకు నిలువెత్తు నిదర్శనం’గా అభివర్ణించారు. శిబిరంలో లబ్ధిదారులతో నేరుగా ముచ్చటించిన ఆయన, కృత్రిమ అవయవాల సాయంతో వారు చేసిన పరేడ్‌ను ఆసక్తిగా తిలకించి వారిని ప్రోత్సహించారు. ఈ సందర్భంగా ఆయన మాట్లాడుతూ.. "కరుణ, సామూహిక కృషి తోడైతే అద్భుతాలు సాధించవచ్చని ఈ శిబిరం నిరూపించింది. సంస్థ అధ్యక్షుడు ప్రశాంత్ అగర్వాల్ చేస్తున్న కృషి అభినందనీయం" అని పేర్కొన్నారు.

సేవా పథంలో నారాయణ్ సేవా సంస్థాన్: స్థాపన: 1985 (కైలాస్ మానవ్ ద్వారా)
 అవయవాల పంపిణీ: 39,000 మందికి పైగా..
 వైద్య సేవలు: 4.5 లక్షల మందికి పైగా లబ్ధి.
శిబిరం ముగింపులో సేవలో భాగస్వాములైన దాతలను ఘనంగా సన్మానించారు. కృత్రిమ అవయవాల సాయంతో సొంతంగా నీళ్లు తాగుతూ, నడక సాగిస్తున్న వారిని చూసి అక్కడికి వచ్చిన వారంతా భావోద్వేగానికి లోనయ్యారు.