హైదరాబాద్: 

 రాష్ట్రంలో రిజిస్ట్రేషన్ల రద్దీకి చెక్ పెట్టేందుకు ప్రభుత్వం కీలక నిర్ణయం తీసుకుంది. భూముల విలువలను వాస్తవ మార్కెట్ ధరలకు అనుగుణంగా సవరించాలన్న క్యాబినెట్ నిర్ణయంతో సబ్‌ రిజిస్ట్రార్ కార్యాలయాలు (SRO) జనసంద్రంగా మారాయి. కొత్త ధరలు అమల్లోకి వస్తే స్టాంప్ డ్యూటీ భారం పెరుగుతుందనే ఆందోళనతో కొనుగోలుదారులు ఒక్కసారిగా ఎగబడుతున్నారు. ఈ అనూహ్య తాకిడిని తట్టుకునేందుకు, ప్రజలకు ఇబ్బందులు కలగకుండా చూసేందుకు రెవెన్యూ శాఖ రంగంలోకి దిగింది. ఇందులో భాగంగా ఈ నెల 29వ తేదీ నుంచి జూన్ 3వ తేదీ వరకు రిజిస్ట్రేషన్ కార్యాలయాల పని వేళలను పొడిగిస్తున్నట్లు రెవెన్యూ, గృహనిర్మాణ, సమాచార పౌర సంబంధాల శాఖ మంత్రి పొంగులేటి శ్రీనివాస్ రెడ్డి ప్రకటించారు.

*రాత్రి 7:30 గంటల వరకు ఆఫీసులు ఓపెన్:
ఇకపై రాష్ట్రంలోని అన్ని సబ్‌ రిజిస్ట్రార్ కార్యాలయాలు "ఉదయం 9:30 గంటల నుంచే సేవలు ప్రారంభించి, రాత్రి 7:30 గంటల వరకు, నిరంతరాయంగా పనిచేయనున్నాయి. కార్యాలయాలకు వచ్చే ప్రజలు గంటల తరబడి వేచి ఉండాల్సిన పరిస్థితి రాకూడదనే ఉద్దేశంతోనే ఈ మార్పులు చేశారు. డిమాండ్‌ను బట్టి అవసరమైతే అదనపు సమయంతో పాటు, మరిన్ని రోజులు కూడా పని వేళలను పొడిగించేందుకు ప్రభుత్వం సిద్ధంగా ఉందని మంత్రి స్పష్టం చేశారు.

*దళారీల ఆటలు సాగవు: ఐజీకి మంత్రి ఆదేశాలు
 "ప్రజలకు సేవ చేయడమే ప్రభుత్వ ధ్యేయం. రిజిస్ట్రేషన్ ప్రక్రియలో వేగం, పారదర్శకత, సౌకర్యం అనే మూడు ప్రధాన లక్ష్యాలతో ముందుకు వెళ్తున్నాం. కార్యాలయాల చుట్టూ దళారులు తిరిగితే సహించేది లేదు."

ఈ మేరకు రిజిస్ట్రేషన్ల శాఖ ఇన్‌స్పెక్టర్ జనరల్ (ఐజీ) రాజీవ్ గాంధీ హనుమంతుకు మంత్రి ప్రత్యేక ఆదేశాలు జారీ చేశారు. తీవ్రమైన ఎండలను దృష్టిలో ఉంచుకుని కార్యాలయాల వద్ద తాగునీరు, నీడ (షామియానాలు) వంటి కనీస వసతులుసరీగా కల్పించాలని, ఎక్కడా అవినీతికి తావులేకుండా సీసీ కెమెరాల నిఘాలో ప్రక్రియ ముగించాలని స్పష్టం చేశారు. పారదర్శకతకు పెద్దపీట వేస్తూ ప్రభుత్వం తీసుకున్న ఈ నిర్ణయం రియల్ ఎస్టేట్ వర్గాల్లో సంచలనంగా మారింది.