జీహెచ్‌ఎంసీ  కార్యాలయం ప్రజా సేవకు కాదు, అవినీతి తిమింగలాల సుఖవాసానికి కేరాఫ్ అడ్రస్‌గా మారినట్లుంది! చనిపోయిన మహిళనూ వదలకుండా పింఛన్ నిధులు నొక్కేసిన ఓ ఘనపాఠి ‘రికార్డ్ అసిస్టెంట్’ లీలలు బయటపెడితే.. చర్యలు తీసుకోవాల్సిన సాబ్స్, బాధితులపైనే సింహాల్లా గర్జిస్తున్నారు. ‘యాక్షన్ టేకెన్ రిపోర్ట్’ అడిగితే అడిషనల్ కమిషనర్ శంకరయ్య అండ్ కో ప్రదర్శిస్తున్న అహంకారం చూస్తుంటే, వీరు పౌర సేవకులా లేక అవినీతికి అంగరక్షకులా అనే అనుమానం కలగక మానదు. కమిషనర్ ఆర్.వి.కర్ణన్ గారూ.. మీ కళ్లెదుటే సాగుతున్న ఈ ‘పెన్షన్’ దోపిడీపై ఏసీబీ, విజిలెన్స్ బ్రహ్మాస్త్రాలు ఎప్పుడు కదులుతాయి? లంచగొండుల దౌర్జన్యానికి చరమగీతం పాడేదెన్నడు?

హైదరాబాద్:

గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) ప్రధాన కార్యాలయంలో అవినీతి వ్యవహారాలు మరోసారి కలకలం రేపుతున్నాయి. ప్రభుత్వ పెన్షన్ నిధుల దుర్వినియోగానికి పాల్పడిన ఓ ఉద్యోగిపై ఫిర్యాదు చేస్తే, దానికి సంబంధించిన ‘చర్యల నివేదిక’ (యాక్షన్ టేకెన్ రిపోర్ట్) ఇవ్వకుండా అధికారులు బాధితులను వేధిస్తున్నారనే తీవ్ర ఆరోపణలు వెల్లువెత్తాయి. పారదర్శకతకు పెద్దపీట వేస్తున్నామని చెప్పే జీహెచ్ఎంసీ యంత్రాంగం.. క్షేత్రస్థాయిలో మాత్రం సమాచారం అడిగిన పౌరులను కార్యాలయాల చుట్టూ తిప్పుతూ నిర్లక్ష్యంగా సమాధానాలు ఇస్తోంది.

*సమాచారం అడిగితే దురుసు సమాధానాలు!
అయితే, ఈ ఫిర్యాదుపై ప్రస్తుతం జీహెచ్ఎంసీ తీసుకున్న పూర్తి స్థాయి చర్యల నివేదిక (ATR) ఇవ్వాలని ఫోరమ్ ప్రతినిధులు కోరగా, ప్రధాన కార్యాలయంలోని కొందరు అధికారులు పారదర్శకతకు గూటం పడుతున్నారు. జీహెచ్ఎంసీ హెడ్ ఆఫీస్‌కు చెందిన అధికారులు హరి రతన్ (ఏఎంసీ), శంకరయ్య, బాలాజీ అనే అధికారులు సమాచారం ఇవ్వకుండా బాధితులను వేధిస్తున్నట్లు ఆరోపణలు వస్తున్నాయి.

“మేము రిపోర్ట్ ఇవ్వము, ఏం చేసుకుంటావో చేసుకో.

 “పై అధికారికి ఫార్వార్డ్ చేశాం, తర్వాత వాళ్లే చూసుకుంటారు.”

అంటూ సదరు అధికారులు బాధ్యతారాహిత్యంగా, అవమానకరంగా మాట్లాడటమే కాకుండా.. ఫోన్ కాల్స్‌కు కూడా స్పందించడం లేదని ఫోరమ్ ప్రతినిధులు మీడియా వేదికగా ఆవేదన వ్యక్తం చేశారు.

*ప్రజాస్వామ్య విలువలకు విరుద్ధం: బాధితుల ఆవేదన.

ప్రజా ప్రయోజనాల కోసం ఒక పౌరుడు లేదా స్వచ్ఛంద సంస్థ ఫిర్యాదు చేసినప్పుడు, దానిపై ఏం చర్యలు తీసుకున్నారో తెలుసుకునే హక్కు ప్రతి పౌరుడికి ఉంటుంది. కానీ జీహెచ్ఎంసీ అధికారులు పాత పద్ధతుల్లోనే వ్యవహరిస్తూ సమాచారాన్ని తొక్కిపెట్టే ప్రయత్నం చేస్తున్నారని ఫోరమ్ ఫర్ యాంటీ కరప్షన్ అండ్ హ్యూమన్ రైట్స్ ప్రతినిధులు మండిపడ్డారు. ఈ వ్యవహారంపై వారు క్రింది డిమాండ్లను లేవనెత్తారు:
 తక్షణ నివేదిక: అవినీతి ఉద్యోగిపై తీసుకున్న పూర్తి స్థాయి చర్యల నివేదికను (ATR) వెంటనే బహిర్గతం చేయాలి.
 
అధికారులపై విచారణ: సమాచారం ఇవ్వకుండా నిర్లక్ష్యంగా ప్రవర్తించిన హరి రతన్, శంకరయ్య, బాలాజీలపై శాఖాపరమైన విచారణ జరిపి చర్యలు తీసుకోవాలి.
 
క్రిమినల్ కేసులు: ప్రభుత్వ పెన్షన్ నిధులను దారి మళ్లించిన బాధ్యులందరిపై క్రిమినల్ కేసులు నమోదు చేయాలి.

 *వ్యవస్థలో మార్పు:
జీహెచ్ఎంసీ ప్రజా ఫిర్యాదుల (గ్రీవెన్స్) విభాగంలో పారదర్శకత పెంచాలి.
ఈ అవినీతి బాగోతాన్ని, అధికారుల అహంకార వైఖరిని ప్రజల ముందుకు తీసుకువచ్చి న్యాయం జరిగేలా చూసేందుకే మీడియాను ఆశ్రయించినట్లు ఫోరమ్ ప్రతినిధులు స్పష్టం చేశారు.