రంగారెడ్డి:

రాష్ట్ర ప్రభుత్వం తాము రైతు పక్షపాతినని గొప్పలు చెప్పుకుంటున్నా, క్షేత్రస్థాయిలో మాత్రం అన్నదాతల పరిస్థితి అత్యంత దారుణంగా తయారైందని రంగారెడ్డి జిల్లా గ్రంథాలయ సంస్థ మాజీ చైర్మన్, బీఆర్ఎస్ నాయకుడు కప్పాటి పాండురంగా రెడ్డి విమర్శించారు. పండించిన పంటను అమ్ముకోవడానికి కొనుగోలు కేంద్రాల వద్ద రైతులు రాత్రింబవళ్లు పడిగాపులు కాస్తున్నా, సంబంధిత ప్రభుత్వ యంత్రాంగం పట్టించుకోకపోవడం దురదృష్టకరమన్నారు. గురువారం ఆయన మీడియాతో మాట్లాడుతూ.. జిల్లాలోని పలు మండలాల్లో ఏర్పాటు చేసిన కొనుగోలు కేంద్రాలకు రైతులు తెచ్చిన ధాన్యంలో సగం కూడా ఇప్పటివరకు సేకరించలేదని మండిపడ్డారు.

*తేమ సాకు.. క్వింటాలుకు 8 కిలోల తరుగు!
ప్రభుత్వం నిర్ణయించిన నాణ్యతా ప్రమాణాల పేరుతో అధికారులు, మిల్లుల యజమానులు కుమ్మక్కై రైతులను నిలువునా దోచుకుంటున్నారని పాండురంగా రెడ్డి ధ్వజమెత్తారు. రైతులు ధాన్యాన్ని బాగా ఆరబెట్టి తెచ్చినా, ఇంకా 'తేమ శాతం ఎక్కువ ఉంది' అనే సాకుతో క్వింటాలుకు 5 నుంచి 8 కిలోల వరకు తరుగు తీస్తున్నారని ఆరోపించారు. కష్టపడి పండించిన పంటను తక్కువ ధరకు అమ్ముకోలేక, అలాగని ఇంటికి తీసుకెళ్లలేక రైతులు కేంద్రాల వద్దే కన్నీళ్లు పెట్టుకుంటున్నారని ఆవేదన వ్యక్తం చేశారు.

*అప్పుల పాలవుతున్న అన్నదాత
ఒకవేళ ఎలాగోలా ధాన్యం విక్రయించినా, రైతు ఖాతాల్లోకి డబ్బులు ఎప్పుడు జమవుతాయో తెలియని అయోమయ స్థితి నెలకొందని పాండురంగా రెడ్డి ఆందోళన వ్యక్తం చేశారు. నగదు జమ కావడంలో జరుగుతున్న ఆలస్యం వల్ల, తదుపరి సాగుకు పెట్టుబడి కోసం రైతులు మళ్లీ ప్రైవేట్ వడ్డీ వ్యాపారులను ఆశ్రయించాల్సి వస్తోందని చెప్పారు. ప్రభుత్వం ప్రకటించిన సన్న రకం వరి ధాన్యం అదనపు ప్రోత్సాహకం (బోనస్) క్వింటాలుకు రూ. 500 చొప్పున రైతుల బ్యాంకు ఖాతాల్లో త్వరగా జమ చేయాలని డిమాండ్ చేశారు.