పహాడీషరీఫ్:
పేద ప్రజలకు అందాల్సిన రేషన్ బియ్యాన్ని అక్రమంగా తరలిస్తున్న ఒక పెద్ద నెట్‌వర్క్‌ను పోలీసులు, ఎన్‌ఫోర్స్‌మెంట్ టాస్క్‌ఫోర్స్ (ఈటీఎఫ్) అధికారులు గురువారం తెల్లవారుజామున ఉమ్మడి ఆపరేషన్‌తో విజయవంతంగా బట్టబయలు చేశారు. విశ్వసనీయ సమాచారం మేరకు పహాడీషరీఫ్ పోలీస్ స్టేషన్ పరిధిలోని ఔటర్ రింగ్ రోడ్ (ఓఆర్ఆర్) సమీపంలో నిర్వహించిన తనిఖీల్లో భారీగా రేషన్ బియ్యం లోడ్‌తో వెళ్తున్న ఒక లారీని అడ్డుకుని సీజ్ చేశారు.

ఎగ్జిట్-14 వద్ద అర్ధరాత్రి ఆపరేషన్
నమ్మదగిన సమాచారం అందడంతో ఈటీఎఫ్ టీమ్-5 సిబ్బంది పహాడీషరీఫ్ పోలీసులను అప్రమత్తం చేశారు. రెండు బృందాలు కలిసి ఈరోజు తెల్లవారుజామున ఓఆర్ఆర్ ప్రాంతంలో వ్యూహాత్మకంగా నిఘా పెట్టాయి. ఈ క్రమంలో ఎగ్జిట్-14 వద్ద అనుమానాస్పదంగా వెళ్తున్న గుజరాత్ రిజిస్ట్రేషన్ కలిగిన ఒక 16 టైర్ల భారీ లారీని (GJ-03-BY-2618) అధికారులు అడ్డుకున్నారు. లారీని క్షుణ్ణంగా తనిఖీ చేయగా, అందులో ప్లాస్టిక్ సంచులలో దాచిన భారీ మొత్తంలో రేషన్ బియ్యం బయటపడింది. "అధికారులు ఆ బియ్యాన్ని వేబ్రిడ్జ్ వద్ద తూకం వేయించగా.. మొత్తం 33,420 కిలోల (334.20 క్వింటాళ్లు) అక్రమ బియ్యం ఉన్నట్లు నిర్ధారణ అయింది".

రాజస్థాన్ ముఠా అరెస్ట్.. బియ్యం ఆమన్‌గల్ లోడ్!
లారీని నడుపుతున్న డ్రైవర్, క్లీనర్‌లను అదుపులోకి తీసుకుని విచారించగా విస్తుపోయే నిజాలు వెలుగులోకి వచ్చాయి. పట్టుబడిన నిందితులను రాజస్థాన్‌కు చెందిన డ్రైవర్ ఉర్స్ ఖాన్ (32), క్లీనర్ నవాబ్‌లుగా గుర్తించారు. రంగారెడ్డి జిల్లాలోని ఆమన్‌గల్ ప్రాంతంలో ఈ రేషన్ బియ్యాన్ని లారీలోకి లోడ్ చేశారని, దీనిని గుజరాత్ రాష్ట్రానికి అక్రమంగా రవాణా చేస్తున్నట్లు నిందితులు అంగీకరించారు.

 లోడింగ్ నిర్వాహకుడు: స్థానికంగా ఉంటూ బియ్యాన్ని సేకరించి లారీ ఎక్కించిన వ్యక్తి ఎస్. కృష్ణయ్యగా తేలింది.
 'మధ్యవర్తి: ఈ రవాణా నెట్‌వర్క్‌ను పర్యవేక్షిస్తూ, లారీని సమకూర్చిన మధ్యవర్తిగా అవినాష్ అనే వ్యక్తి వ్యవహరించినట్లు పోలీసులు గుర్తించారు. వీరందరి మొబైల్ నెంబర్ల ఆధారంగా తదుపరి విచారణ జరుపుతున్నారు.