ఎల్బీనగర్:

స్థానిక మ్యాచ్ పాయింట్ బ్యాడ్మింటన్ అకాడమీ క్రీడాకారులు కోర్టులో అద్భుత ప్రదర్శనతో అదరగొట్టారు. హోరాహోరీగా సాగిన బ్యాడ్మింటన్ ఛాంపియన్‌షిప్ ఓపెన్ కేటగిరీ మిశ్రమ డబుల్స్ విభాగంలో లక్ష్య సంహిత వెంట్రప్రగడ, ఆమె భాగస్వామి నీరజ్ కుమార్ వేటనాల జోడీ స్వర్ణ పతకాన్ని ముద్దాడింది. టోర్నమెంట్ అంతటా తిరుగులేని ఆటతీరుతో సాగిన ఈ యువ జంట, ఈ విజయంతో రాష్ట్ర స్థాయి టోర్నమెంట్‌కు అర్హత సాధించింది.

*దిగ్గజాలను మట్టికరిపించిన వేళ..
ఈ టోర్నమెంట్‌లో లక్ష్య సంహిత - నీరజ్ కుమార్ లీగ్ దశ నుంచి ఫైనల్ వరకు ప్రత్యర్థులకు చుక్కలు చూపించారు. వీరు సాగించిన విజయయాత్ర ఇలా ఉంది:
 *క్వార్టర్ ఫైనల్:అగ్ర శ్రేణి (టాప్-5) ర్యాంక్ జోడీ అయిన విశ్వాస్ గురుంగ్ – ప్రియా ప్రకాష్‌లపై 15-12, 15-10 స్కోరుతో ఘన విజయం సాధించి ముందడుగు వేశారు.

 *ఫైనల్ సమరం:
 తుది పోరులో ఆనంద్ – వెన్నెల జంటపై 15-10, 15-01 స్కోరుతో ఏకపక్ష విజయాన్ని నమోదు చేసి బంగారు పతకాన్ని సొంతం చేసుకున్నారు.

*ఘనంగా బహుమతుల ప్రదానం
పోటీల అనంతరం నిర్వహించిన బహుమతుల ప్రదానోత్సవంలో వికారాబాద్ బ్యాడ్మింటన్ అసోసియేషన్ అధ్యక్షులు కొసరాజు లక్ష్మణ్, శాసనసభ్యులు (ఎమ్మెల్యే) అరేకపుడి గాంధీ ముఖ్య అతిథులుగా హాజరై విజేతలకు పతకాలను అందజేశారు.
 "కష్టపడి శ్రమిస్తే విజయం ఎప్పుడూ మన వెంటే ఉంటుంది. ఈ యువ జోడీ భవిష్యత్తులో దేశం గర్వించే స్థాయికి ఎదుగుతుంది."
*వేణు ముప్పాల, మ్యాచ్ పాయింట్ సంస్థాపకులు

విజేతలను మ్యాచ్ పాయింట్ వ్యవస్థాపకులు, చైర్మన్ వేణు ముప్పాల ప్రత్యేకంగా అభినందించారు. లక్ష్య సంహిత అంతర్జాతీయ స్థాయిలో రాణించేందుకు అన్ని రకాల నైపుణ్యాలు ఉన్నాయని, భవిష్యత్తులో ఆమె మరిన్ని ఉన్నత శిఖరాలను అధిరోహిస్తుందని ఆశాభావం వ్యక్తం చేశారు.