పటాన్‌చెరు:

అభివృద్ధి పేరుతో వెలిసిన పరిశ్రమలు ఇప్పుడు స్థానిక ప్రజల పాలిట యమపాశాలుగా మారుతున్నాయి. ఉపాధి లభిస్తుందని ఆశపడ్డ గ్రామస్థులకు రోగాలు, కన్నీళ్లే మిగులుతున్నాయి. గడ్డపోతారం మున్సిపాలిటీ పరిధిలోని అయ్యమ్మ చెరువు కాలుష్య కోరల్లో చిక్కుకుని విలవిలలాడుతోంది. ఈ క్రమంలో సోమవారం క్షేత్రస్థాయిలో పరిస్థితిని సమీక్షించిన ఎమ్మెల్యే గూడెం మహిపాల్ రెడ్డి, కాలుష్య నియంత్రణ మండలి (PCB), నీటి పారుదల శాఖ అధికారుల తీరుపై తీవ్ర ఆగ్రహం వ్యక్తం చేశారు.

నిబంధనలు గాలికి.. చెరువుల్లోకి కెమికల్ నీళ్లు!
గడ్డపోతారం పారిశ్రామిక వాడలోని కొన్ని పరిశ్రమలు పర్యావరణ నిబంధనలను బేఖాతరు చేస్తూ రాత్రికి రాత్రే రసాయన వ్యర్థాలను అయ్యమ్మ చెరువులోకి వదులుతున్నాయి. ఫలితంగా చెరువు నీరు నల్లగా మారి, దుర్వాసన వెదజల్లుతోంది.
 మృత్యుఘోష: కలుషిత నీటిని తాగి పశుపక్షాదులు మృత్యువాత పడుతున్నాయి.
 కనుమరుగవుతున్న వ్యవసాయం: ఒకప్పుడు పంటలతో కళకళలాడిన భూములు ఇప్పుడు రసాయనాల సాంద్రత పెరిగి బీడువారాయి.

అధికారుల నిర్లక్ష్యంపై ఎమ్మెల్యే ‘ఫైర్’*
చెరువు కట్టపైనే నిర్వహించిన సమీక్షా సమావేశంలో ఎమ్మెల్యే అధికారులను నిలదీశారు. ప్రజలు ప్రత్యక్ష నరకం అనుభవిస్తుంటే, పర్యవేక్షించాల్సిన పీసీబీ అధికారులు ఏం చేస్తున్నారని ప్రశ్నించారు. "ప్రజల ప్రాణాల కంటే పరిశ్రమలు ఎక్కువ కావు. ఫిర్యాదులు అందుతున్నా చర్యలు తీసుకోవడంలో ఎందుకు జాప్యం చేస్తున్నారు?" అని మండిపడ్డారు. తీరు మార్చుకోని 14 పరిశ్రమల జాబితాను ప్రభుత్వానికి పంపి, వాటిని సీజ్ చేసేలా చర్యలు తీసుకుంటామని స్పష్టం చేశారు.

పరిశ్రమలకు అల్టిమేటం*
"లాభాల వేటలో ప్రజల ప్రాణాలతో ఆడుకుంటే సహించేది లేదు. కాలుష్యం వెదజల్లే పరిశ్రమలను తరిమికొట్టేందుకు కూడా వెనకాడం" అని ఎమ్మెల్యే హెచ్చరించారు. ఈ సమావేశంలో మున్సిపల్ చైర్మన్, వైస్ చైర్మన్, వివిధ శాఖల ఈఈలు మరియు స్థానిక నాయకులు పాల్గొన్నారు.
అయ్యమ్మ చెరువు పునరుజ్జీవం పొందుతుందా లేదా అధికారుల నిర్లక్ష్యం ఇలాగే కొనసాగుతుందా అనేది వేచి చూడాలి.