హస్తినాపురం:
భారత రాజ్యాంగ నిర్మాత, జ్ఞాన భాస్కరుడు డాక్టర్ బాబాసాహెబ్ అంబేద్కర్ 135వ జయంతి ఉత్సవాలను పురస్కరించుకుని హస్తినాపురంలో 'అంబేద్కర్ జయంతి ఉత్సవ కమిటీ' ఆధ్వర్యంలో విద్యా సంస్కరణలపై కీలక చర్చా వేదిక నిర్వహించారు. ఈ కార్యక్రమానికి నేతృత్వం వహించిన *ఉత్సవ కమిటీ చైర్మన్ మరియు కార్పొరేట్ విద్యా నియంత్రణ జేఏసీ అధ్యక్షులు చెన్నోజు శ్రీనివాసులు*, ప్రస్తుత విద్యా వ్యవస్థలో జరుగుతున్న అన్యాయాలను ఎండగడుతూ విశ్లేషణాత్మక ప్రసంగం చేశారు.

*విద్యా వ్యవస్థ.. క్యాపిటలిస్టుల గుప్పిట్లో!*
నేటి విద్యా వ్యవస్థ పెట్టుబడిదారుల కబంధహస్తాల్లో చిక్కుకుని విలవిలలాడుతోందని చెన్నోజు శ్రీనివాసులు ఆవేదన వ్యక్తం చేశారు. నాణ్యమైన విద్య అందరికీ సమానంగా అందాలంటే ప్రైవేట్ విద్యా సంస్థలను రద్దు చేయాల్సిన ఆవశ్యకత ఉందని ఆయన స్పష్టం చేశారు. కేవలం లాభాపేక్షతో నడుస్తున్న కార్పొరేట్ సంస్థల వల్ల పేద విద్యార్థులు ఉన్నత విద్యకు దూరమవుతున్నారని, ఈ దోపిడీ ఆగాలంటే రాజ్యాంగ పరిరక్షణ వేదిక ద్వారా ఉద్యమించక తప్పదని శ్రీనివాసులు పిలుపునిచ్చారు.

*పాలకుల పిల్లలకు సర్కారు బడే దిక్కు కావాలి*
ఈ కార్యక్రమంలో పాల్గొన్న నందిగామ వెంకటేష్ మాట్లాడుతూ, ముఖ్యమంత్రి మనవడు చదివే బడుల్లోనే శ్రమజీవుల బిడ్డలు కూడా చదవాలని, ఆ స్థాయిలో ప్రభుత్వ పాఠశాలల్లో వసతులు ఉండాలని డిమాండ్ చేశారు. ముఖ్యమంత్రి మొదలుకుని, మంత్రులు, ఎంపీలు, ఎమ్మెల్యేలు మరియు ప్రభుత్వ ఉద్యోగుల పిల్లలు, మనవలు కచ్చితంగా ప్రభుత్వ స్కూల్స్ మరియు కాలేజీల్లోనే చదవాలని, అప్పుడే ప్రభుత్వ విద్యా వ్యవస్థ బలోపేతం అవుతుందని పేర్కొన్నారు.

ప్రజలు అడగని, ప్రాముఖ్యత లేని పథకాలు స్కాములుగా మారుతున్నాయని, ప్రజలకు కావాల్సింది కేవలం నాణ్యమైన విద్యేనని కమిటీ నేతలు ఉద్ఘాటించారు. ఈ కార్యక్రమంలో రాజ్యాంగ పరిరక్షణ వేదిక ప్రతినిధులు, విద్యార్థి సంఘాల నేతలు మరియు పెద్ద సంఖ్యలో శ్రమజీవులు పాల్గొని అంబేద్కర్ ఆశయాల సాధనకు ప్రతిజ్ఞ చేశారు.