సలేశ్వరం జాతరలో ‘ప్లాస్టిక్’ వద్దు.

ప్రకృతిని కాపాడుకుందాం: త్రిపుర గవర్నర్ ఇంద్రసేనారెడ్డి.
ప్రపంచ పర్యావరణ సంస్థ గోడపత్రిక ఆవిష్కరణ.
నల్లమలలో కాలుష్య నివారణకు భక్తులు సహకరించాలి

హైదరాబాద్:

ప్రకృతి ఒడిలో వెలసిన సలేశ్వరం లింగమయ్య క్షేత్రాన్ని కాలుష్య కోరల నుంచి కాపాడాలని త్రిపుర గవర్నర్ నల్లు ఇంద్రసేనారెడ్డి పిలుపునిచ్చారు. అడవిని కాపాడుకోవాల్సిన బాధ్యత ప్రతి భక్తుడిపై ఉందన్నారు. ప్రపంచ పర్యావరణ సంస్థ ఆధ్వర్యంలో రూపొందించిన గోడ పత్రికను ఆయన గురువారం ఆవిష్కరించారు. ఈ సందర్భంగా ఆయన మాట్లాడుతూ.. దక్షిణ అమరనాథ్ యాత్రగా పేరొందిన సలేశ్వరం జాతర నేటి నుంచి ప్రారంభమవుతున్న నేపథ్యంలో, భక్తులంతా క్రమశిక్షణతో మెలగాలని కోరారు. ప్లాస్టిక్ రహిత జాతరగా మార్చేందుకు ప్రతి ఒక్కరూ నడుం బిగించాలని సూచించారు.

పర్యావరణ పరిరక్షణలో ‘ప్రపంచ పర్యావరణ సంస్థ’ భేష్

గడిచిన 14 ఏళ్లుగా ‘స్వచ్ఛ భారత్ - స్వస్థ భారత్’ లక్ష్యంతో గల్లీ నుంచి ఢిల్లీ దాకా ప్రపంచ పర్యావరణ సంస్థ చేస్తున్న కృషిని గవర్నర్ కొనియాడారు. సుమారు 10 వేల మంది టీచర్లకు శిక్షణ ఇచ్చి, పర్యావరణ ఉద్యమంలో భాగస్వాములను చేయడం గొప్ప విషయమన్నారు. తిరుమల, మేడారం వంటి పుణ్యక్షేత్రాల్లో ప్లాస్టిక్ నివారణకు సంస్థ చేస్తున్న పోరాటాన్ని ఆయన అభినందించారు. ప్రజా చైతన్యంతోనే ఆరోగ్యవంతమైన సమాజ నిర్మాణం సాధ్యమవుతుందని పేర్కొన్నారు.

ఇంటికి.. ఒంటికి ప్లాస్టిక్ ముప్పు!
ప్రజల సంపాదనలో 30 శాతం హాస్పిటల్స్ పాలవుతోందని, దీనికి ప్లాస్టిక్ కాలుష్యమే ప్రధాన కారణమని సంస్థ వ్యవస్థాపక అధ్యక్షుడు డాక్టర్ సి.హెచ్. భద్ర ఆందోళన వ్యక్తం చేశారు. “మనం తినే ఆహారం, తాగే నీటి ద్వారా రోజూ 2 నుంచి 4 గ్రాముల ప్లాస్టిక్ శరీరంలోకి వెళ్తోంది. దీన్ని అరికట్టేందుకు స్టీల్ బాటిళ్లు, జ్యూట్ బ్యాగుల వాడకాన్ని ప్రోత్సహిస్తున్నాం” అని సంస్థ జాతీయ కార్యదర్శి సాగర్ తెలిపారు. దేశవ్యాప్తంగా ప్రతి రాష్ట్రంలో కోటి మందిని చైతన్యపరచడమే తమ లక్ష్యమని వివరించారు.

ఈ కార్యక్రమంలో బీజేపీ నాయకులు అందెల శ్రీరాములు యాదవ్, సంస్థ సభ్యులు శ్రావణ్ యాదవ్, పవన్ కుమార్, యంగ్ లీడర్స్ ఫౌండర్ జయంత్, సిరి చందన తదితరులు పాల్గొన్నారు.

About The Author

Bharatha Sakthi Desk

సలేశ్వరం జాతరలో ‘ప్లాస్టిక్’ వద్దు.

About The Author

Latest News

Related Posts

www.bharathasakthi.com