​హైదరాబాద్:

 అది ఒకట్రెండు ఏళ్ల పోరాటం కాదు.. ఏకంగా మూడు దశాబ్దాల యుద్ధం. బడా కబ్జాదారులు, అండగా నిలిచిన కొందరు అధికారులు.. వెరసి పార్కు స్థలాన్ని మింగేయాలని చూశారు. కానీ, ఆ రిటైర్డ్ ఉద్యోగుల పట్టుదల ముందు అక్రమార్కులు మోకరిల్లక తప్పలేదు. ఆర్కే పురం ఆఫీసర్స్ కాలనీలో 3 వేల గజాల పార్కు స్థలం ఎట్టకేలకు కాలనీవాసుల వశమైంది. ఈ విజయంలో కీలక పాత్ర పోషించిన స్థానికులను హైడ్రా కమిషనర్ ఏవీ రంగనాథ్ సోమవారం ప్రత్యేకంగా అభినందించి, శాలువాతో సన్మానించారు.

​అధికారులను బురిడీ కొట్టించి..
​1968లో ఏర్పడిన ఈ కాలనీలో పార్కు కోసం కేటాయించిన స్థలంపై కబ్జాదారుల కన్ను పడింది. 1997 నుంచే ఈ వివాదం మొదలైంది. కోర్టులు 'ఇది పార్కు స్థలమే' అని తేల్చి చెప్పినా, అక్రమార్కులు వెనక్కి తగ్గలేదు. సిబ్బందిని మేనేజ్ చేసి 2008లో ఎల్ఆర్ఎస్ (LRS) కూడా పొందారు. 2011లో ఏకంగా నిర్మాణ అనుమతులు తెచ్చుకుని జేసీబీలతో రంగంలోకి దిగారు. కానీ కాలనీవాసులు ప్రాణాలకు తెగించి అడ్డుకున్నారు.

​"మీరే మాకు స్ఫూర్తి"
"సాధారణంగా మేం ఆక్రమణలు తొలగిస్తే జనం వచ్చి మమ్మల్ని సన్మానిస్తారు. కానీ, మీరు చేసిన పోరాటం సామాన్యమైంది కాదు. రిటైర్మెంట్ తర్వాత కూడా పర్యావరణం కోసం, సమాజం కోసం ఇంతలా పోరాడటం గొప్ప విషయం. అందుకే మిమ్మల్ని గౌరవించుకుంటున్నాం" అని కమిషనర్ రంగనాథ్ కొనియాడారు.