మల్కాజ్‌గిరి:

వాహనాలు నడుపుతూ సెల్‌ఫోన్‌ మాట్లాడే బేఖాతరు డ్రైవర్లపై మల్కాజ్‌గిరి ట్రాఫిక్ పోలీసులు ఉక్కుపాదం మోపారు. రహదారి భద్రతను పెంపొందించడమే లక్ష్యంగా కమిషనరేట్ వ్యాప్తంగా మంగళవారం ప్రత్యేక తనిఖీలు (స్పెషల్ డ్రైవ్) చేపట్టారు. మల్కాజ్‌గిరి పోలీస్ కమిషనర్ శ్రీమతి బి. సుమతి, IPS ఉత్తర్వుల మేరకు ట్రాఫిక్ జోన్-I, జోన్-II పరిధిలోని అన్ని పోలీస్ స్టేషన్లలో ఈ తనిఖీలు ముమ్మరంగా సాగాయి.
డిసిపి (ట్రాఫిక్–I), డిసిపి (ట్రాఫిక్–II)ల ప్రత్యక్ష పర్యవేక్షణలో జరిగిన ఈ నిఘా చర్యల్లో ఏసీపీలు, ఇన్‌స్పెక్టర్లు, సబ్-ఇన్‌స్పెక్టర్లు, సిబ్బంది పెద్ద ఎత్తున పాల్గొన్నారు. కమిషనరేట్ వ్యాప్తంగా ప్రధాన కూడళ్లు, కారిడార్లు, సిగ్నల్ పాయింట్లు, రద్దీగా ఉండే ప్రాంతాలలో ప్రత్యేక బృందాలను మోహరించి నిబంధనలు ఉల్లంఘించిన వారిని పట్టుకున్నారు.

మొదటిరోజే భారీగా జరిమానాలు:
ఈ ప్రత్యేక తనిఖీల్లో భాగంగా నిబంధనలు ఉల్లంఘించి సెల్‌ఫోన్ వాడుతూ వాహనాలు నడిపిన వారిపై *మొత్తం 1,340 కేసులు* నమోదు చేశారు. నిందితులకు *రూ. 13,39,000/- (పదమూడు లక్షల ముప్పై తొమ్మిది వేల రూపాయలు)* జరిమానా విధించినట్లు అధికారులు వెల్లడించారు.
డ్రైవింగ్ చేస్తూ మొబైల్‌లో మాట్లాడటం, మెసేజ్‌లు పంపడం (టెక్స్టింగ్), ఇంటర్నెట్ బ్రౌజింగ్, వీడియో రికార్డింగ్ చేయడం, ఇతర ఎలక్ట్రానిక్ పరికరాలను ఆపరేట్ చేయడం లాంటి ప్రమాదకర చర్యలకు పాల్పడిన వారిని గుర్తించి చట్టప్రకారం చర్యలు తీసుకున్నారు.

— మల్కాజ్‌గిరి ట్రాఫిక్ పోలీస్ సందేశం