పెన్ పట్టిన చేతులు పిడికిలి ఎత్తాయి! అక్షర సైనికులు హక్కుల పోరాట క్షేత్రంలోకి దూకారు. పాలకుల వివక్షపై, ప్రభుత్వ నిర్లక్ష్య వైఖరిపై జర్నలిస్టులు సమరశంఖం పూరించారు. అమరవీరుల సాక్షిగా 'ఛలో హైదరాబాద్' అంటూ తరలివచ్చిన అక్షర శ్రామికులను సచివాలయ ముట్టడికి వెళ్లకుండా పోలీసులు అడ్డుకోవడం, అక్రమంగా అరెస్టు చేయడం ప్రజాస్వామ్యానికే గొడ్డలిపెట్టు. నాాడు ప్రత్యేక రాష్ట్ర సాధన కోసం ప్రాణాలొడ్డి పోరాడిన జర్నలిస్టులను, నేడు తమ న్యాయమైన హక్కుల కోసం రోడ్డెక్కితే తీవ్రంగా అణచివేయడం దుర్మార్గం. పత్రికల మనుగడ ప్రశ్నార్థకమై, కుటుంబాల భద్రత కరువైనా బెదరక, అక్షరాన్ని ఆయుధంగా మలచి జర్నలిస్టులు చేస్తున్న ఈ న్యాయపోరాటం పాలకుల కళ్లు తెరిపించక మానదు. ఈ పోరుకేక అణచలేనిది, ఆపలేనిది!

*హైదరాబాద్:
రాష్ట్ర ప్రభుత్వ వివక్ష, నిర్లక్ష్య వైఖరికి నిరసనగా, తమ న్యాయమైన డిమాండ్ల సాధన కోసం జర్నలిస్టులు గురువారం చేపట్టిన 'ఛలో హైదరాబాద్' కార్యక్రమం ఉద్రిక్తంగా మారింది. తెలంగాణ వర్కింగ్ జర్నలిస్ట్స్ ఫెడరేషన్ (టి.డబ్ల్యూ.జె.ఎఫ్) రాష్ట్ర కమిటీ ఇచ్చిన పిలుపు మేరకు రాష్ట్రవ్యాప్తంగా వివిధ జిల్లాల నుంచి జర్నలిస్టులు భారీ సంఖ్యలో రాజధానికి తరలివచ్చారు. గన్ పార్క్ నుంచి సచివాలయ ముట్టడికి బయలుదేరిన జర్నలిస్టులను పోలీసులు గన్ పార్క్ వద్దే అడ్డుకొని, బలవంతంగా అరెస్టు చేశారు.

*అమరవీరులకు నివాళి – వినతిపత్రం సమర్పణ
ఈ సందర్భంగా ఫెడరేషన్ వ్యవస్థాపక, రాష్ట్ర అధ్యక్షుడు మామిడి సోమయ్య గన్ పార్క్‌లోని తెలంగాణ అమరవీరుల స్థూపం వద్ద పుష్పగుచ్ఛం ఉంచి ఘనంగా నివాళులర్పించారు. అనంతరం జర్నలిస్టుల సమస్యలతో కూడిన వినతిపత్రాన్ని అమరవీరుల స్థూపానికి సమర్పించారు.

 "రాష్ట్రంలో కాంగ్రెస్ ప్రభుత్వం ఏర్పడి రెండున్నర సంవత్సరాలు గడుస్తున్నప్పటికీ, జర్నలిస్టులకు ఇచ్చిన ఎన్నికల హామీలను నెరవేర్చకుండా మొండిచేయి చూపుతోంది. ప్రభుత్వం అనుసరిస్తున్న నిర్లక్ష్య వైఖరి వల్ల రాష్ట్రంలో అనేక చిన్న, మధ్య తరహా పత్రికలు మూతపడే పరిస్థితికి వచ్చాయి. గత రెండున్నర ఏళ్లుగా ప్రభుత్వం ప్రకటనల బకాయిలను (అడ్వర్టైజ్‌మెంట్ బిల్స్) చెల్లించకపోవడం దారుణం."

*జర్నలిస్టుల ప్రధాన డిమాండ్లు ఇవే:
 * *బకాయిల విడుదల:* చిన్న, మధ్యతరహా పత్రికల పెండింగ్ ప్రకటనల బిల్లులను వెంటనే చెల్లించాలి.,
 *కార్డుల జారీ: ప్రతి శ్రమజీవి అయిన జర్నలిస్టుకు గుర్తింపు కార్డు (అక్రెడిటేషన్) తో పాటు ఆరోగ్య కార్డు (హెల్త్ కార్డు) మంజూరు చేయాలి.
 *ఇళ్ల స్థలాలు: గ్రేటర్ హైదరాబాద్‌తో సహా రాష్ట్రవ్యాప్తంగా జర్నలిస్టులందరికీ ఇళ్లు, ఇళ్ల స్థలాలు కేటాయించాలి.

 పత్రికల ఎంపానెల్‌మెంట్: భారత పత్రికల రిజిస్ట్రార్ (ఆర్.ఎన్.ఐ), ప్రెస్ రిజిస్ట్రార్ జనరల్ ఆఫ్ ఇండియా (పి.ఆర్.జి.ఐ) గుర్తింపు ఉండి, క్రమబద్ధంగా వస్తున్న పత్రికలను ప్రభుత్వ ప్రకటనల జాబితాలో (ఎంపానెల్‌మెంట్) చేర్చాలి.
 *ఉచిత విద్య, వైద్యం: జర్నలిస్టుల పిల్లలకు ప్రైవేట్, కార్పొరేట్ విద్యాసంస్థల్లో ఉచిత విద్యను, కార్పొరేట్ ఆసుపత్రుల్లో ఉచిత వైద్య సదుపాయాన్ని కల్పించాలి.,
 బీమా, పెన్షన్లు: ప్రతి జర్నలిస్టుకు ఉచిత బీమా పథకాన్ని వర్తింపజేయాలి. 60 ఏళ్లు దాటిన సీనియర్ జర్నలిస్టులకు పింఛను (పెన్షన్) సౌకర్యం కల్పించాలి.
 బడ్జెట్ కేటాయింపులు: జర్నలిస్టుల సంక్షేమం కోసం రాష్ట్ర బడ్జెట్‌లో రూ.100 కోట్లు కేటాయించాలి.,
 ఉచిత ప్రయాణం: జర్నలిస్టులందరికీ ఆర్టీసీ బస్సుల్లో ఉచిత ప్రయాణ సౌకర్యం కల్పించాలి.

*ప్లకార్డులతో నిరసన.. భారీ ర్యాలీ
రాష్ట్రం నలుమూలల నుంచి తరలివచ్చిన వందలాది మంది జర్నలిస్టులు తమ డిమాండ్ల సాధనకై ప్లకార్డులు ప్రదర్శిస్తూ ప్రభుత్వ వ్యతిరేక నినాదాలతో గన్ పార్క్ పరిసరాలను హోరెత్తించారు. అనంతరం సచివాలయం వైపు భారీ ర్యాలీగా దూసుకెళ్లేందుకు ప్రయత్నించగా, పోలీసులు భారీ బారికేడ్లతో వారిని అడ్డుకున్నారు. ఈ క్రమంలో పోలీసులకు, జర్నలిస్టులకు మధ్య తోపులాట జరిగి ఉద్రిక్త వాతావరణం నెలకొంది.

*పోలీసుల అరాచకం.. పోలీస్ స్టేషన్లకు తరలింపు
పోలీసులు జర్నలిస్టులను బలవంతంగా ఈడ్చుకెళ్లి వాహనాల్లో ఎక్కించి అరెస్టు చేశారు. అరెస్టయిన వారిని పంజాగుట్ట, ఆసిఫ్ నగర్ పోలీస్ స్టేషన్లకు తరలించారు. ఈ సందర్భంగా సోమయ్య ప్రభుత్వాన్ని హెచ్చరిస్తూ.. "జర్నలిస్టుల న్యాయమైన కోర్కెలను ఈ ప్రజా ప్రభుత్వం వెంటనే నెరవేర్చాలి. లేనిపక్షంలో గత ప్రభుత్వానికి పట్టిన గతే ఈ ప్రభుత్వానికీ పడుతుంది" అని స్పష్టం చేశారు.

*నిరసనలో పాల్గొన్న ముఖ్య నేతలు
ఈ మహా ధర్నాలో టి.డబ్ల్యూ.జె.ఎఫ్ రాష్ట్ర కో-కన్వీనర్లు బండి విజయ్ కుమార్, యాదగిరి, తన్నీరు శ్రీనివాస్, జాతీయ కౌన్సిల్ సభ్యులు చిర్రా శ్రీనివాస్, దామెర జగదీశ్వర్ గుప్తా, కే. పాండురంగారావు, పద్మనాభరావు, సామ్రాట్ గుప్తా పాల్గొన్నారు.
అలాగే హైదరాబాద్ జిల్లా కన్వీనర్ వి. రవి కుమార్, కో-కన్వీనర్లు ఆర్. శ్రీనివాస్ గౌడ్, సంతోష్ కుమార్, ఎం.రవికుమార్, సుభాష్, రేగటి వెంకన్నలతో పాటు వివిధ జిల్లాల అధ్యక్ష, కార్యదర్శులు నానబాల రామకృష్ణ, అర్వపల్లి నగేష్ (ఖమ్మం), గండీటి నర్సింహా, గోపాల్ (మహబూబ్ నగర్), మధు (మంచిర్యాల), పాల్వాయి జానయ్య, ముషం హరిప్రసాద్ (సూర్యాపేట), జక్కుల విజయ్ కుమార్, స్వామిదాస్, పాలడుగు సురేందర్ (వరంగల్), దూమర్ల భాస్కర్ (నాగర్ కర్నూల్), అశోక్ కుమార్ గౌడ్, పర్వతాలు (రంగారెడ్డి), మల్లేశం, గడ్డమీది అశోక్ (మేడ్చల్) తదితరులు పెద్ద సంఖ్యలో పాల్గొన్నారు.