హైదరాబాద్:
కేంద్ర హోం శాఖ సహాయ మంత్రి బండి సంజయ్ కుమార్ లక్ష్యంగా సాగుతున్న రాజకీయ దుష్ప్రచారానికి హైదరాబాద్ సిటీ సివిల్ కోర్టు అడ్డుకట్ట వేసింది. ఆయన కుమారుడు బండి భగీరథ్‌పై నమోదైన పోక్సో కేసును సాకుగా చూపుతూ, సంజయ్‌ను వ్యక్తిగతంగా కించపరిచేలా చేస్తున్న ప్రచారాలపై కోర్టు తీవ్ర ఆగ్రహం వ్యక్తం చేసింది. ఈ మేరకు తక్షణమే అటువంటి కంటెంట్‌ను తొలగించాలని ఆదేశిస్తూ కీలక మధ్యంతర ఉత్తర్వులను జారీ చేసింది.

రాజకీయ కక్షసాధింపుపై న్యాయస్థానం సీరియస్*
గత కొంతకాలంగా సోషల్ మీడియా వేదికగా, రాజకీయ సభల్లో బండి సంజయ్‌ను లక్ష్యంగా చేసుకుని ప్రత్యర్థి పార్టీలు చేస్తున్న విమర్శలు శ్రుతిమించాయని కోర్టు అభిప్రాయపడింది. ఒక కేసును అడ్డం పెట్టుకుని కేంద్ర మంత్రి పదవికి రాజీనామా చేయాలంటూ సాగుతున్న ఒత్తిళ్లు, వ్యక్తిగత దూషణలు ఆయన సామాజిక, రాజకీయ ప్రతిష్టకు తీవ్ర భంగం కలిగిస్తున్నాయని న్యాయస్థానం స్పష్టం చేసింది.

 "రాజకీయ విమర్శలు ప్రజాస్వామ్యంలో సహజమే అయినా, వ్యక్తిత్వ హననానికి పాల్పడటం చట్టరీత్యా నేరం. న్యాయస్థానం దృష్టిలో ఇది అత్యంత తీవ్రమైన విషయం." అని కోర్టు వ్యాఖ్యానించింది.

ప్రతిష్టకు భంగం కలిగించే కుట్ర?
కేంద్ర హోం శాఖలో కీలక బాధ్యతలు నిర్వహిస్తున్న తరుణంలో, సంజయ్‌ను నైతికంగా దెబ్బతీసేందుకు పక్కా ప్రణాళికతో ఈ ప్రచారం సాగుతోందని బాధితుడి తరపు న్యాయవాదులు వాదించారు. ఈ వాదనలతో ఏకీభవించిన కోర్టు, ఇకపై అటువంటి ప్రచారాలు పునరావృతం కాకుండా చూడాలని హెచ్చరించింది. ఈ ఉత్తర్వులతో విపక్షాల దూకుడుకు బ్రేక్ పడినట్లయింది.
రాజకీయాల్లో ఆరోగ్యకరమైన విమర్శలు ఉండాలి తప్ప, కుటుంబ సభ్యుల కేసులను వాడుకుని వ్యక్తిగత దాడులకు దిగడం సరికాదన్న కోర్టు తీర్పు ఇప్పుడు రాజకీయ వర్గాల్లో చర్చనీయాంశంగా మారింది.