కోల్ కత్తా:
పశ్చిమ బెంగాల్ రాజకీయాల్లో మరో సంచలనం చోటుచేసుకుంది. ఎన్నికల్లో పరాజయం అనంతరం మాజీ ముఖ్యమంత్రి మమతా బెనర్జీ కొత్త అవతారమెత్తారు. పరిపాలనా పగ్గాలను కాసేపు పక్కన పెట్టి, న్యాయవాదిగా నల్లకోటు ధరించి కోల్కతా హైకోర్టు బోనులో నిలబడ్డారు. రాష్ట్రంలో అసెంబ్లీ ఎన్నికల తర్వాతి హింసపై తన పార్టీ నేతలు దాఖలు చేసిన పిటిషన్పై ఆమె స్వయంగా వాదనలు వినిపించడం ఇప్పుడు దేశవ్యాప్తంగా చర్చనీయాంశమైంది.
పోలీసులు ప్రేక్షక పాత్ర పోషించారు: మమత
రాష్ట్రంలో జరుగుతున్న దాడుల నుంచి ప్రజలను కాపాడేందుకు న్యాయస్థానం తక్షణమే జోక్యం చేసుకోవాలని మమతా బెనర్జీ కోర్టును అభ్యర్థించారు. ఎన్నికల తర్వాతి హింసాకాండలో పోలీసులు నిమ్మకు నీరెత్తినట్లు వ్యవహరించారని, బాధితులకు రక్షణ కరువైందని ఆమె తన వాదనల్లో పేర్కొన్నారు. ఈ అల్లర్ల వెనుక ఉన్న శక్తులను అరికట్టేందుకు న్యాయపరమైన ఆదేశాలు అవసరమని కోరారు.
టీఎంసీ తరఫున మమత చేసిన వాదనలను ప్రభుత్వ న్యాయవాది తోసిపుచ్చారు. పిటిషన్లో పేర్కొన్న హింసాత్మక ఘటనలు, బాధితుల వివరాలు అస్పష్టంగా ఉన్నాయని, ప్రాథమిక ఆధారాలు లేవని వాదించారు. దీనిపై ప్రభుత్వం అఫిడవిట్ దాఖలు చేస్తుందని కోర్టుకు తెలిపారు. ఇరుపక్షాల వాదనలు విన్న హైకోర్టు బెంచ్.. తన మధ్యంతర ఉత్తర్వులను రిజర్వు చేసింది. త్వరలోనే వీటిని ఆన్లైన్లో అప్లోడ్ చేస్తామని వెల్లడించింది.
రంగంలోకి బార్ కౌన్సిల్ ఆఫ్ ఇండియా (BCI)
మాజీ ముఖ్యమంత్రి హోదాలో ఉండి కోర్టులో ప్రాక్టీస్ చేయడంపై 'బార్ కౌన్సిల్ ఆఫ్ ఇండియా' తక్షణమే స్పందించింది. న్యాయవాదిగా మమతా బెనర్జీ అర్హతలపై ఆరా తీసింది. దీనిపై 48 గంటల్లో నివేదిక ఇవ్వాలని పశ్చిమ బెంగాల్ బార్ కౌన్సిల్ను ఆదేశించింది.
* రాజ్యాంగబద్ధమైన పదవిలో ఉన్నా లేదా లాభదాయకమైన ప్రభుత్వ ఉద్యోగంలో ఉన్నా వారి న్యాయవాద లైసెన్స్ సస్పెన్షన్లో ఉంటుంది.
* తిరిగి ప్రాక్టీస్ చేయాలంటే బార్ కౌన్సిల్ నుంచి ముందస్తు అనుమతి పొంది, లైసెన్స్ను పునరుద్ధరించుకోవాలి.
* మమత ఈ ప్రక్రియను పూర్తి చేశారా లేదా అన్న కోణంలో BCI విచారణ చేపట్టింది.
ఒకవైపు రాజకీయ వైఫల్యం, మరోవైపు న్యాయపోరాటం.. ఈ రెండింటి మధ్య మమతా బెనర్జీ వేసిన ఈ అడుగు బెంగాల్ రాజకీయాలను ఏ మలుపు తిప్పుతుందో వేచి చూడాలి.
About The Author
.jpeg)
.jpeg)
