ఒక ఊరిలో అందరికీ నీతులు చెప్పే పెద్దలందరూ కలిసి ఒక సంఘాన్ని ఏర్పాటు చేసుకున్నారట. ఆ సంఘం ఎన్నికల్లో ఎవరికి ఓటు వేయాలో తెలియక జనం అయోమయంలో పడ్డారు. "అయ్యా! మీలో ఎవరిపై ఏ ఏ కేసులు ఉన్నాయో చెబితే, మంచి వ్యక్తిని ఎంచుకుంటాం" అని ఓటరు అడిగితే.. "మేము చట్టాన్ని రక్షించే జ్ఞానులం, మా చిట్టా అడిగే హక్కు నీకు లేదు" అని గద్దించారట. పక్కనే ఉన్న ఒక పిట్ట ఇది విని, "అద్దాల మేడలో ఉండి పక్కవాడిపై రాళ్లు విసరడం అంటే ఇదేనేమో.. ఎదుటివారికి ఏకరువు పెట్టే నీతులు, వీరికి మాత్రం వర్తించవా?" అని నవ్వుకుంటూ ఎగిరిపోయింది.

​హైదరాబాద్:

న్యాయం కోసం సామాన్యుడు తలదాచుకునే పవిత్ర దేవాలయం కోర్టు. ఆ కోవెలలో ధర్మం వైపు నిలబడాల్సిన వారే.. తమ నేపథ్యం విషయంలో ‘ముసుగు’ వేస్తే ఎలా? సమాజానికి నీతులు చెప్పే మేధావుల ఎన్నికల్లో పారదర్శకతకు పాతర వేయడమేమిటి? ఎంపీలు, ఎమ్మెల్యేలే తమ నేర చరిత్రను దేశం ముందు పెడుతున్నప్పుడు, చట్టం తెలిసిన మేధావులు తమ అఫిడవిట్లను ఓటర్ల ముందుకు ఉంచడానికి అభ్యంతరం ఏమిటి? ఇప్పుడు ఇవే ప్రశ్నలు తెలంగాణ న్యాయ వర్గాల్లో సంచలనం సృష్టిస్తున్నాయి.

​తెలంగాణ రాష్ట్ర బార్ కౌన్సిల్ సభ్యత్వానికి సంబంధించి శుక్రవారం జరిగిన ఎన్నికలు వివాదానికి కేంద్రబిందువుగా మారాయి. 25 స్థానాల కోసం 209 మంది న్యాయవాదులు బరిలో నిలవగా, వారిలో ఎవరికి నేర చరిత్ర ఉంది? ఎవరిపై క్రమశిక్షణా చర్యలు పెండింగ్‌లో ఉన్నాయి? అన్న విషయాలను బార్ కౌన్సిల్ బయటపెట్టకపోవడంపై తీవ్ర నిరసన వ్యక్తమవుతోంది. ఓటరుకు తన అభ్యర్థి గురించి తెలుసుకునే కనీస హక్కును కాలరాస్తున్నారంటూ హైకోర్టులో దాఖలైన రిట్ పిటిషన్ (W.P. No. 2899 of 2026) ఇప్పుడు సర్వత్రా చర్చనీయాంశమైంది.
​సుప్రీం తీర్పుకు తూట్లు పొడిచినట్టేనా?
​2002లో ‘అసోసియేషన్ ఫర్ డెమోక్రటిక్ రిఫార్మ్స్’ కేసులో సుప్రీం కోర్టు ఇచ్చిన చారిత్రాత్మక తీర్పును పిటిషనర్ బి. సుభాష్ ఈ సందర్భంగా గుర్తు చేశారు.
​రాజ్యాంగం ఏం చెబుతోంది?: అధికరణలు 14, 19(1)(a), మరియు 21 ప్రకారం సమాచారం తెలుసుకోవడం ఓటరు ప్రాథమిక హక్కు.

​వృత్తి ధర్మమా.. ముసుగు రాజకీయామా?

​న్యాయవాద వృత్తిలో ‘నీతి’ అనేది అత్యున్నత శిఖరం. అటువంటి వృత్తిని పర్యవేక్షించే బార్ కౌన్సిల్ లోకి అడుగుపెట్టే వారు నిష్కళంకమైన నేపథ్యం కలిగి ఉండాలి. కానీ, వివరాలను బహిర్గతం చేయకపోవడం వల్ల అభ్యర్థుల నిజస్వరూపం ఓటరుకు తెలియడం లేదు. అంధకారంలో ఓటు వేయడం ప్రజాస్వామ్యానికే గొడ్డలిపెట్టు అని న్యాయ నిపుణులు అభిప్రాయపడుతున్నారు.

​కోర్టులో ‘మాండమస్’ విన్నపం:

​తక్షణం జోక్యం చేసుకుని, పోటీ చేసిన 209 మంది అభ్యర్థుల పూర్తి వివరాలను వెబ్‌సైట్‌లో ఉంచేలా బార్ కౌన్సిల్‌ను ఆదేశించాలని పిటిషనర్ కోరారు. చట్టం ముందు అందరూ సమానమేనని చాటిచెప్పేలా ఈ కేసు విచారణ జరగాలని న్యాయవాద లోకం ఆసక్తిగా ఎదురుచూస్తోంది. ఈ పోరు కేవలం ఎన్నికల కోసం మాత్రమే కాదు.. న్యాయవాద వృత్తిలోని నైతిక విలువలను కాపాడటం కోసమని పిటిషనర్ స్పష్టం చేశారు.