లోక కల్యాణార్థం 'మహారుద్ర సహిత సహస్రచండీ' యాగం.

భక్తిశ్రద్ధలతో పాల్గొన్న కార్పొరేటర్ మొద్దు లచ్చి రెడ్డి.

On 30 Jan 2026 15:15:14

లోక కల్యాణార్థం 'మహారుద్ర సహిత సహస్రచండీ' యాగం.

ఎల్బీనగర్:

లోక కల్యాణాన్ని కాంక్షిస్తూ, దేశ విదేశాల్లోని ప్రజలందరూ ఆయురారోగ్యాలతో, సుఖ సంతోషాలతో వర్ధిల్లాలని రాగన్నగూడలో "మహారుద్ర సహిత సహస్రచండీ" మహాయాగాన్ని అత్యంత వైభవంగా నిర్వహిస్తున్నారు.
శ్రీ రేణుక రాజరాజేశ్వరి పీఠం ఆధ్వర్యంలో, ప్రముఖ ఆధ్యాత్మిక వేత్త శ్రీ మెల్లూరి నవీన్ శర్మ గారి పర్యవేక్షణలో జరుగుతున్న ఈ జగన్మాత సేవలో ఆధ్యాత్మిక శోభ సంతరించుకుంది.

ప్రత్యేక పూజల్లో కార్పొరేటర్:

ఈ పవిత్ర క్రతువులో భాగంగా బి.యన్.రెడ్డి నగర్ డివిజన్ జిహెచ్ఎంసి కార్పొరేటర్ మొద్దు లచ్చి రెడ్డి శనివారం యాగశాలను సందర్శించి ప్రత్యేక పూజా కార్యక్రమాలు నిర్వహించారు. ఈ సందర్భంగా ఆయన మాట్లాడుతూ.. సమాజ హితం కోసం ఇలాంటి మహాయాగాలు నిర్వహించడం అభినందనీయమని కొనియాడారు. అమ్మవారి దివ్య ఆశీస్సులు ప్రజలందరికీ లభించాలని, రాష్ట్రం సుభిక్షంగా ఉండాలని ఆయన ప్రార్థించారు.

ఆధ్యాత్మిక మార్గంలో సామాజిక హితం ప్రస్తుత యాంత్రిక జీవనంలో ఆధ్యాత్మికత ద్వారానే మానసిక ప్రశాంతత లభిస్తుందని నిర్వాహకులు ఈ యాగం ద్వారా చాటిచెబుతున్నారు. సహస్రచండీ యాగం వంటి శక్తివంతమైన పూజలు ప్రకృతి వైపరీత్యాలను నివారించి, లోక శాంతిని చేకూరుస్తాయని భక్తుల విశ్వాసం. నవీన్ శర్మ గారి ఆధ్వర్యంలో వేద మంత్రోచ్ఛారణల మధ్య జరుగుతున్న ఈ కార్యక్రమం భక్తులను విశేషంగా ఆకట్టుకుంటోంది.

ఈ కార్యక్రమంలో కార్పొరేటర్ వెంట బిజెపి డివిజన్ ప్రధాన కార్యదర్శి విష్ణువర్ధన్ రెడ్డి, సీనియర్ నాయకులు వెంకట్రాంరెడ్డి, బీజేవైఎం అధ్యక్షులు సురేష్ కుమార్ తో పాటు పలువురు పార్టీ నాయకులు, భక్తులు పెద్ద సంఖ్యలో పాల్గొన్నారు. యాగశాల పరిసరాలు అమ్మవారి నామస్మరణతో మారుమోగుతున్నాయి.