కేబీఆర్ పార్కు ఫ్లైఓవర్ పనులు వేగవంతం చేయాలి

క్షేత్రస్థాయిలో పురోగతిని పరిశీలించిన పురపాలక శాఖ ప్రత్యేక ప్రధాన కార్యదర్శి

On 03 Apr 2026 15:26:35

కేబీఆర్ పార్కు ఫ్లైఓవర్ పనులు వేగవంతం చేయాలి

హైదరాబాద్:

నగరంలోని కేబీఆర్ పార్కు పరిసరాల్లో చేపట్టిన ఫ్లైఓవర్ నిర్మాణ పనులను మరింత వేగవంతం చేయాలని రాష్ట్ర పురపాలక, పట్టణాభివృద్ధి శాఖ ప్రత్యేక ప్రధాన కార్యదర్శి జయేష్ రంజన్ ఇంజినీరింగ్ అధికారులను ఆదేశించారు. గురువారం ఆయన జీహెచ్‌ఎంసీ కమిషనర్ ఆర్.వి.కర్ణన్, చీఫ్ ఇంజినీర్ సహదేవ్ రత్నాకర్‌తో కలిసి ఎల్.వి.ప్రసాద్ కంటి ఆసుపత్రి నుంచి జూబ్లీహిల్స్ చెక్ పోస్ట్, రోడ్ నంబర్ 45 వరకు పనుల పురోగతిని క్షేత్రస్థాయిలో పరిశీలించారు.

ఈ సందర్భంగా ఆయన అధికారులకు పలు సూచనలు చేశారు:
ట్రాఫిక్ కష్టాలకు పరిష్కారం: జూబ్లీహిల్స్ ప్రాంతంలో ట్రాఫిక్ ఇబ్బందులను శాశ్వతంగా తొలగించేందుకు ప్రభుత్వం ఈ ప్రతిష్టాత్మక ప్రాజెక్టును చేపట్టిందని, దీనిని గడువులోగా పూర్తి చేసేలా పక్కా కార్యాచరణ సిద్ధం చేసుకోవాలని సూచించారు.

వారంతపు సమీక్ష: పనుల పురోగతిపై ఇంజినీరింగ్ అధికారులు ప్రతి వారం సమీక్ష నిర్వహించి, ఎదురయ్యే ఆటంకాలను వెంటనే తొలగించాలని ఆదేశించారు.

అదనపు వనరులు: నిర్మాణ పనుల్లో వేగం పెంచేందుకు వీలుగా మెగా (MEIL) సంస్థ మరిన్ని యంత్రాలను, అదనపు సిబ్బందిని కేటాయించాలని కమిషనర్ స్పష్టం చేశారు.

ఈ తనిఖీలో ప్రాజెక్ట్స్ విభాగానికి చెందిన ఈఈ, డీఈఈ, ఏఈఈ అధికారులు మరియు నిర్మాణ సంస్థ ప్రతినిధులు పాల్గొన్నారు.