తిరుమల శ్రీ వేంకటేశ్వర స్వామి వారిపై భక్తికి, సమర్పించే కానుకలకు యుగాల చరిత్ర ఉంది. రాజుల కాలం నుంచి నేటి ఆధునిక పారిశ్రామికవేత్తల వరకు, హిందూ మతస్థులే కాకుండా ఇతర మతాల వారు సైతం ఏడుకొండలవాడికి విలువైన ఆభరణాలను సమర్పిస్తూ తమ భక్తిని చాటుకుంటున్నారు. ఈ కానుకల వెనుక ఉన్నది కేవలం బంగారం, వజ్రాల విలువ కాదు.. యుగాలుగా కోట్లాది భక్తులు స్వామివారిపై కురిపిస్తున్న అచంచలమైన భక్తి, విశ్వాసం.

12వ శతాబ్దం నుంచి శ్రీవారికి కొనసాగుతున్న కానుకలు
12వ శతాబ్దం నుంచే శ్రీవారికి కానుకలు అందించే సంప్రదాయం ఉన్నప్పటికీ, విజయనగర చక్రవర్తి శ్రీకృష్ణదేవరాయల పాలనలో ఇది శిఖరస్థాయికి చేరింది. ఆయన 1513లో రెండు వేర్వేరు సందర్భాల్లో వజ్రాలు, కెంపులతో పొదిగిన కిరీటంతో పాటు నవరత్న ఖచిత ఆభరణాలు, స్వర్ణఖడ్గం వంటివి స్వామివారికి సమర్పించి తన భక్తిని చాటుకున్నారు. ఆకాశరాజు, తొండమాన్‌ చక్రవర్తి వంటి ఎందరో రాజులు స్వామివారికి అపురూప ఆభరణాలు అందించిన వారిలో ఉన్నారు.

ఆధునిక కాలం కానుకలు
రాజుల కాలం నాటి సంప్రదాయం నేటికీ అదే వైభవంతో కొనసాగుతోంది. ఆధునిక కాలంలోనూ శ్రీవారికి అత్యంత విలువైన కానుకలు అందుతున్నాయి. 2009లో గాలి జనార్దనరెడ్డి సుమారు 42 కోట్ల రూపాయల విలువైన వజ్రకిరీటాన్ని సమర్పించారు. అలాగే, గోయంకా కుటుంబం 10 కిలోల బంగారు కిరీటాన్ని, పెన్నా సిమెంట్స్‌ సంస్థ 5 కోట్ల రూపాయల విలువైన వజ్రాల కటి, వరద హస్తాలను కానుకగా అందించారు.