రెడ్డి సంఘాలన్నీ ఏకతాటిపైకి రావాలి: మల్‌రెడ్డి రాంరెడ్డి

On 18 Mar 2026 12:16:22

అబ్దుల్లాపూర్‌మెట్:

రాష్ట్రవ్యాప్తంగా విస్తరించి ఉన్న వివిధ రెడ్డి సేవా సంఘాలన్నీ సమన్వయంతో ముందుకు సాగి, ఒకే సంక్షేమ సంఘంగా ఆవిర్భవించాలని రాష్ట్ర రోడ్డు అభివృద్ధి సంస్థ ఛైర్మన్ మల్‌రెడ్డి రాంరెడ్డి పిలుపునిచ్చారు. బ్రాహ్మణపల్లిలోని పరిణయ కన్వెన్షన్‌లో గుర్రం పాపిరెడ్డి ఆధ్వర్యంలో మంగళవారం నిర్వహించిన ‘రెడ్డి గర్జన ఉగాది పురస్కారాలు - 2026’ వేడుకలకు ఆయన ముఖ్య అతిథిగా హాజరయ్యారు.

ముందుగా జ్యోతి ప్రజ్వలనతో కార్యక్రమాన్ని ప్రారంభించిన రాంరెడ్డి, పరాభవ నామ సంవత్సర ఉగాది పురస్కారాలను పలువురు ప్రముఖులకు అందజేశారు. అనంతరం ‘రెడ్డి గర్జన’ నూతన డైరీని ఆవిష్కరించారు.

ఐక్యతతోనే సామాజిక సాధికారత:
ఈ సందర్భంగా రాంరెడ్డి మాట్లాడుతూ.. విడివిడిగా సేవా కార్యక్రమాలు చేయడం కంటే, అన్ని సంఘాలు ఐక్యమైతే మరింత భారీ స్థాయిలో సామాజిక సేవ చేసే వీలుంటుందని అభిప్రాయపడ్డారు. ఉమ్మడి వేదిక ద్వారా ప్రభుత్వం నుంచి అందే సహకారాన్ని కూడా సమర్థవంతంగా పొందవచ్చని సూచించారు. కేవలం స్వకులం మాత్రమే కాకుండా, నిరుపేద రెడ్డి కుటుంబాలతో పాటు ఇతర కులాల్లోని పేదలను ఆదుకోవడం మన సామాజిక బాధ్యత అని గుర్తుచేశారు.

ముఖ్య అతిథులు - ప్రముఖులు
ఈ కార్యక్రమంలో తిరుపతి అంతర్జాతీయ రెడ్డి భవన్ ఛైర్మన్ మురళీకృష్ణా రెడ్డి, ఫైనాన్స్ కమిషన్ సభ్యులు సంకేపల్లి సుధీర్ రెడ్డి, రెడ్డి సంఘం రాష్ట్ర కన్వీనర్ బద్దూరి వెంకటేశ్వర్ రెడ్డి పాల్గొన్నారు. అలాగే మాజీ వైస్ ఎంపీపీ మల్‌రెడ్డి యాదిరెడ్డి, వైసీపీ అధికార ప్రతినిధి శ్యామలా రెడ్డి, బల్వంత్ రెడ్డి, వంగేటి గోపాల్ రెడ్డి తదితరులు పాల్గొని ప్రసంగించారు. రెడ్డి సామాజిక వర్గం ఐక్యత, భవిష్యత్తు కార్యాచరణపై పలువురు వక్తలు తమ అభిప్రాయాలను పంచుకున్నారు.