మణుగూరు సింగరేణి ఏరియా జియం కార్యాలయంలో గల సివిల్ డిపార్ట్మెంట్ లో ఓ కాంట్రాక్టర్ అవినీతి అక్రమాలతో రాజ్యమేలుతున్నాడు. కొత్తగా వచ్చిన అధికారులు కూడా అతని మోచేతి నీళ్లు త్రాగాల్సిందేనని పలువురు కాంట్రాక్టర్లు చర్చించుకుంటున్నారు. రోజురోజుకు క్లాస్-4 కాంట్రాక్టర్లు సింగరేణిలో పెరుగుతున్నారు. క్లాస్ -4 కాంట్రాక్టర్ల చేత దొంగ టెండర్లు వేయించి వారు దక్కించుకున్న వర్కులను ఆయన వశంచేసుకుంటాడనే ఆరోపణలు వెల్లువెత్తుతున్నాయి. ఇతగాడిపై పత్రికలో కధనం వస్తే అంతా పెద్ద సార్ కడుకుంటారులే అని ధీమా వ్యక్తం చేస్తున్నారు. అంటే పెద్ద సార్ ఈయన చెప్పుచేతల్లో ఉన్నాడంటే వారి మధ్య సాన్నిహిత్యం 'మామూళ్ల'గా లేదని చెప్పవచ్చునని తోటి కాంట్రాక్టర్లు చర్చించుకోవడం గమనార్హం. 

 క్లాస్-4తో మైనస్ టెండర్లు :

సింగరేణిలో ఓపెన్, సామజిక కోణంలో టెండర్లు కొనసాగుతాయి. ఓపెన్ బిడింగ్ కు వచ్చే సరికి పోటీ తత్వం ఉడడంతో వర్కులకు బిడింగ్ అందరూ వేసుకోవచ్చు. అదే సామాజిక కోణంలో అయితే ఎస్సి, ఎస్టీ వర్గాలకు చెందిన వారు మాత్రమే బిడింగ్ లో పాల్గొంటారు. ఓపెన్ బిడింగ్ కు సభ్యత్వం తీసుకున్న వారు మాత్రమే యూనియన్ గా ఏర్పడి అందులోంచి ఒక్కరూ మాత్రమే బిడింగ్ లో పాల్గొని వర్క్ దక్కించుకుంటారు. తిష్టవేసిన కాంట్రాక్టర్ మాత్రం కుంతంత్రాలతో వర్కులు దక్కించుకోవలని పాచికలు వేసి సామాజిక వర్గాల మధ్య చీలికలు తీసుకువచ్చి మిన్నకుండి పోతాడు. చివరికి రెండు కోతులు రొట్టె కోసం కొట్టుకున్న చందంగా ఆయన మైనస్ బిడింగ్ లతో వర్కులు దక్కించుకుంటున్నారని తోటి కాంట్రాక్టర్లు ఆగ్రహం వ్యక్తం చేస్తున్నారు.

విజిలెన్స్ దృష్టి సారించాలి :.

మణుగూరు సింగరేణి జియం కార్యాలయంలోని సివిల్ డిపార్ట్మెంట్ పై విజిలెన్స్ అధికారులు దృష్టి సారిస్తే అందులో జరిగే అక్రమ క్లాస్ -4 కాంట్రాక్టర్ల బాగోతం బట్టబయలు అవుతాయని కార్మిక సంఘాల నాయకులు ముక్తకంఠంతో కోరుతున్నారు. అక్రమంగా క్లాస్-4 కాంట్రాక్టర్లగా లైసెన్సులు పొందే వారిని కట్టడి చేసి బ్రష్టు పట్టిన సివిల్ డిపార్ట్మెంట్ కి దుమ్ముదులి వదిలించాలని తోటి కాంట్రాక్టర్లు వేడుకొంటున్నారు.