హైదరాబాద్:

రాష్ట్రంలోని అర్హులైన జర్నలిస్టులందరికీ ఇళ్ల స్థలాలు కేటాయించేందుకు ప్రభుత్వం చిత్తశుద్ధితో ఉందని రెవెన్యూ, సమాచార పౌరసంబంధాల శాఖ మంత్రి పొంగులేటి శ్రీనివాస్ రెడ్డి స్పష్టం చేశారు. సోమవారం సచివాలయంలో గ్రేటర్ హైదరాబాద్ జర్నలిస్ట్స్ మ్యూచువల్లీ ఎయిడెడ్ కో-ఆపరేటివ్ హౌసింగ్ సొసైటీ ప్రతినిధులు మంత్రిని కలిసి వినతిపత్రం సమర్పించారు.
ఈ సందర్భంగా మంత్రి మాట్లాడుతూ.. జర్నలిస్టుల గృహ నిర్మాణ సమస్య పరిష్కారానికి అన్ని హౌసింగ్ సొసైటీలు ఏకతాటిపైకి రావాలని సూచించారు. సొసైటీలన్నీ కలిసి జేఏసీగా ఏర్పడి, అర్హులైన జర్నలిస్టుల సమగ్ర జాబితాను రూపొందించాలని, అప్పుడే పారదర్శకంగా న్యాయం చేసే వీలుంటుందని ఆయన పేర్కొన్నారు.

మా సొసైటీని గుర్తించండి: ప్రతినిధుల విజ్ఞప్తి
గ్రేటర్ హైదరాబాద్ పరిధిలో పనిచేస్తున్న జర్నలిస్టుల కోసం 2008లో ఏర్పాటు చేసిన తమ సొసైటీని ప్రభుత్వం గుర్తించాలని ప్రతినిధులు కోరారు. 17 ఏళ్లుగా కొనసాగుతున్న ఈ సొసైటీలో ప్రస్తుతం వెయ్యి మందికి పైగా సభ్యులు ఉన్నారని వివరించారు.
 
17 ఏళ్ల నిరీక్షణ: గత ప్రభుత్వం పలుమార్లు విన్నవించినా స్థల కేటాయింపులో చొరవ చూపలేదని వారు ఆవేదన వ్యక్తం చేశారు.
 
ప్రాతినిధ్యం కల్పించాలి: జర్నలిస్టు ఇళ్ల స్థలాలపై ప్రభుత్వం నిర్వహించే సమీక్షా సమావేశాలకు తమను ఆహ్వానించాలని, జేఏసీలో భాగస్వాములను చేయాలని కోరారు.