జీహెచ్‌ఎంసీలో ‘ప్రజావాణి’.. మొరపెట్టుకున్న జనం!

On 12 May 2026 10:23:46

ఆఫీసుల చుట్టూ తిరుగుతున్నా తీరని గోస
హెడ్ ఆఫీస్‌లో 41 దరఖాస్తులు.. పట్టించుకోని క్షేత్రస్థాయి యంత్రాంగం
మొత్తం 59 వినతులు స్వీకరించిన అధికారులు

జీహెచ్‌ఎంసీలో ‘ప్రజావాణి’.. మొరపెట్టుకున్న జనం!

హైదరాబాద్:

బల్దియాలో ప్రజా సమస్యలు ఎక్కడ వేసిన గొంగళి అక్కడే అన్న చందంగా మారాయి. సోమవారం జీహెచ్‌ఎంసీ హెడ్ ఆఫీసులో నిర్వహించిన ‘ప్రజావాణి’ కార్యక్రమానికి ఫిర్యాదులు వెల్లువెత్తాయి. క్షేత్రస్థాయిలో సమస్యలు పరిష్కారం కాకపోవడంతో నగర పౌరులు సుదూర ప్రాంతాల నుండి వచ్చి అధికారులకు మొరపెట్టుకున్నారు. ఈ ఒక్క రోజే మొత్తం 59 వినతులు రాగా, అందులో అత్యధికంగా 41 అప్లికేషన్లు కేవలం హెడ్ ఆఫీసులోనే రావడం గమనార్హం.

కదలని ఫైళ్లు.. తీరని తిప్పలు
జోనల్ ఆఫీసుల్లో సమస్యలు కొలిక్కి రాకపోవడంతోనే జనం హెడ్ ఆఫీస్ మెట్లు ఎక్కుతున్నారు. టౌన్ ప్లానింగ్, భూసేకరణ, పారిశుధ్యం వంటి విభాగాల్లో ఏళ్ల తరబడి పెండింగ్‌లో ఉన్న పనులపై బాధితులు ఆవేదన వ్యక్తం చేశారు. ప్రజావాణిలో అదనపు కమిషనర్ రవి కిరణ్, చీఫ్ ఇంజనీర్ సహదేవ్ రత్నాకర్, సీసీపీ శ్రీనివాస్, డైరెక్టర్ వెంకటేశ్వరరావు సహా పలువురు అధికారులు పాల్గొని అర్జీలు తీసుకున్నారు. అందిన వినతులపై ఆయా విభాగాల అధికారులు వెంటనే స్పందించి పరిష్కరించాలని ఆదేశించారు.

జోన్ల వారీగా 'ప్రజావాణి' తీరు:
ప్రజల నుండి వచ్చిన వినతుల్లో జోన్ల వారీగా వివరాలు ఇలా ఉన్నాయి. కొన్ని జోన్లలో అంకెలు తక్కువగా ఉన్నప్పటికీ, సమస్యల తీవ్రత మాత్రం తగ్గడం లేదు.
* *హెడ్ ఆఫీస్:* 41
* *శంషాబాద్:* 07
* *ఖైరతాబాద్:* 04
* *రాజేంద్రనగర్:* 03
* *సికింద్రాబాద్:* 03
* *చార్మినార్:* 01
* *గోల్కొండ:* 0
వచ్చిన దరఖాస్తుల్లో ఎక్కువ శాతం అక్రమ కట్టడాల కూల్చివేత, డ్రైనేజీ సమస్యలు, ఆస్తి పన్ను గొడవలపైనే ఉన్నట్లు తెలుస్తోంది. మరి ఈ వినతులైనా పరిష్కారమవుతాయా లేక బుట్టదాఖలు అవుతాయా అని జనం ఎదురుచూస్తున్నారు.