*వనస్థలిపురం:
ప్రజలపై మోయలేని భారం వేస్తూ, ప్రత్యామ్నాయం చూపకుండా పేదల ఇళ్లను, వీధి వ్యాపారుల తోపుడు బండ్లను అక్రమంగా తొలగిస్తే ఊరుకునేది లేదని, సుందరయ్య స్ఫూర్తితో ప్రజా సమస్యలపై పోరాటాలను మరింత ఉధృతం చేస్తామని సీపీఎం స్పష్టం చేసింది. మంగళవారం వనస్థలిపురం రైతు బజార్ చౌరస్తాలో కమ్యూనిస్టు ఉద్యమ నిర్మాత, అణగారిన వర్గాల ఆశాజ్యోతి పుచ్చలపల్లి సుందరయ్య 41వ వర్ధంతి సభ నిర్వహించారు. సీపీఎం ఎల్బీనగర్ పరిధి అధ్యక్షురాలు ఎ. రాధమ్మ అధ్యక్షతన జరిగిన ఈ కార్యక్రమానికి రంగారెడ్డి జిల్లా కార్యదర్శివర్గ సభ్యుడు ఎం. చంద్రమోహన్, ఎల్బీనగర్ పరిధి కార్యదర్శి ఆలేటి ఎల్లయ్య ముఖ్య అతిథులుగా హాజరై సుందరయ్య చిత్రపటానికి పూలమాలలు వేసి నివాళులర్పించారు.

*ఆస్తిపై వ్యామోహం వద్దనే.. పిల్లలు కనలేదు!
ఈ సందర్భంగా ఎం. చంద్రమోహన్ మాట్లాడుతూ.. పేదల కూడు, గూడు, గుడ్డ వంటి కనీస అవసరాలు, మౌలిక వసతుల కల్పన కోసం పార్లమెంటు లోపలా, బయటా నిరంతరం పోరాడిన మహోన్నత వ్యక్తి సుందరయ్య అని కొనియాడారు.

"భూస్వామ్య కుటుంబంలో పుట్టినప్పటికీ, తన వాటాకు వచ్చిన భూమినంతా పేద ప్రజలకు పంచిపెట్టిన ఆదర్శ నాయకుడు ఆయన. పిల్లలు పుడితే ఆస్తిపై, కుటుంబంపై వ్యామోహం పెరుగుతుందనే ఉద్దేశంతో సుందరయ్య దంపతులు స్వచ్ఛందంగా సంతాన నిరోధక శస్త్రచికిత్స చేయించుకున్నారు."
*ఎం. చంద్రమోహన్, సీపీఎం జిల్లా నేత

*సీపీఎం ప్రధాన డిమాండ్లు:
 *ధరలు తగ్గించాలి:
 విపరీతంగా పెరిగిన పెట్రోల్, డీజిల్, వంటగ్యాస్ ధరలతో పాటు మున్సిపల్ ఇండ్ల పన్నులను వెంటనే తగ్గించాలి.

 వైన్స్ దుకాణాలు తొలగించాలి: జాతీయ రహదారుల పక్కన ఉన్న మద్యం దుకాణాలను వెంటనే తొలగించాలి.
 
యుద్ధం వద్దు - శాంతి కావాలి: అమెరికా సామ్రాజ్యవాద ధోరణితో ఇరాన్‌పై జరుగుతున్న అనాలోచిత యుద్ధాన్ని తక్షణమే ఆపాలి. దీనివల్ల అంతర్జాతీయంగా చమురు, గ్యాస్ కొరత ఏర్పడుతోంది. ప్రపంచానికి యుద్ధం వద్దు.. శాంతి కావాలి.
ఈ కార్యక్రమంలో సీపీఎం నాయకులు, కార్యకర్తలు భారతమ్మ, కాశమ్మ, అర్జున్, మల్లేష్, ఝాన్సీ, శాంతి భాయ్, అంజి నాయక్, మల్లయ్య, నిర్మలమ్మ, కుమారి, కుద్బుద్దీన్, రాములమ్మ తదితరులు పాల్గొన్నారు.