మైలార్‌దేవ్‌పల్లి:

మైలార్‌దేవ్‌పల్లిలోని పట్టణ ప్రాథమిక ఆరోగ్య కేంద్రాన్ని (యు.పి.హెచ్.సి) రంగారెడ్డి జిల్లా వైద్య ఆరోగ్యశాఖ అధికారి (డి.ఎం.హెచ్.ఓ) డాక్టర్ డి.స్వర్ణకుమారి మంగళవారం ఆకస్మికంగా తనిఖీ చేశారు. ఈ సందర్భంగా ఆసుపత్రిలోని విధుల్లో ఉన్న సిబ్బంది వివరాలను, వారి హాజరు పట్టికను నిశితంగా పరిశీలించారు. అనంతరం వార్డుల్లోని పడకల (బెడ్స్) నిర్వహణను, మందుల గడువు తేదీలను (ఎక్స్‌పైరీ డేట్) తనిఖీ చేశారు. ఆసుపత్రి ప్రాంగణమంతా కలియతిరిగి పారిశుధ్య పరిస్థితులపై సిబ్బందికి పలు సూచనలు చేశారు.

*గర్భిణీలకు మెరుగైన సేవలు అందించాలి
ఆసుపత్రికి వచ్చే గర్భిణీలకు అందుతున్న వైద్య సేవల గురించి అక్కడి వైద్యాధికారులను అడిగి తెలుసుకున్నారు. ఆసుపత్రిలో కాన్పుల (డెలివరీలు) సంఖ్యను మరింత పెంచేలా చర్యలు తీసుకోవాలని ఆదేశించారు.

 * మహిళలకు ఉచితంగా క్యాన్సర్ స్క్రీనింగ్ (వ్యాధి నిర్ధారణ) పరీక్షలు చేయాలి.

*రోగులకు కనీస సౌకర్యాలు కల్పించాలి:
> ఆసుపత్రికి వచ్చే రోగులకు ఎలాంటి ఇబ్బందులు కలగకుండా చూడాలని, వారు వేచి ఉండే ప్రదేశంలో కూర్చునేందుకు కుర్చీలు, సురక్షిత తాగునీటి వసతి కల్పించాలని అధికారులను ఆదేశించారు.

 సేవాభావంతో పనిచేయాలి
ప్రభుత్వం నిర్దేశించిన లక్ష్యాల మేరకు జాతీయ ఆరోగ్య కార్యక్రమాలను విజయవంతం చేయాలని డి.ఎం.హెచ్.ఓ పిలుపునిచ్చారు. వైద్యులు, సిబ్బంది సమయపాలన పాటిస్తూ, రోగుల పట్ల సేవాభావంతో వ్యవహరించి నాణ్యమైన వైద్య సేవలు అందించాలని స్పష్టం చేశారు.
ఈ ఆకస్మిక తనిఖీ కార్యక్రమంలో పట్టణ ప్రాథమిక ఆరోగ్య కేంద్రం వైద్యాధికారి, వైద్య సిబ్బంది పాల్గొన్నారు.