సిద్దిపేట:

సిద్దిపేట జిల్లా దుబ్బాక మండలం, తిమ్మాపూర్ గ్రామానికి చెందిన ప్రముఖ సామాజిక ఉద్యమకారుడు, గ్రామ సర్పంచ్ గుర్రాల శ్రీనివాస్‌కు అంతర్జాతీయ స్థాయిలో అరుదైన గౌరవం దక్కింది. గోవాలో మే 16వ తేదీన అత్యంత వైభవంగా నిర్వహించిన ఇంటర్నేషనల్ హ్యూమన్ రైట్స్ కాన్ఫరెన్స్ – 2026 కార్యక్రమంలో ఆయనకు “హ్యూమన్ రైట్స్ డిఫెండర్ అవార్డు – 2026” ప్రదానం చేశారు.దేశవ్యాప్తంగా మానవ హక్కుల పరిరక్షణ, సామాజిక న్యాయం, రాజ్యాంగ హక్కుల సాధన కోసం కృషి చేస్తున్న ప్రముఖ సామాజిక కార్యకర్తలు, న్యాయవాదులు, ప్రజాసంఘాల నాయకులు, మేధావులను ఒకే వేదికపైకి తీసుకువచ్చిన ఈ అంతర్జాతీయ సదస్సు విశేష ప్రాధాన్యతను సంతరించుకుంది. సమాజంలో అణగారిన వర్గాల పక్షాన నిలబడి సేవలందిస్తున్న వ్యక్తులను గుర్తించి సత్కరించడం ఈ సదస్సు ముఖ్య ఉద్దేశ్యంగా నిర్వాహకులు తెలిపారు.ఈ సందర్భంగా సుప్రీంకోర్టు అడ్వకేట్ శ్రీ రాగసందేశ్, నేషనల్ ప్రెసిడెంట్ శ్రీ కొంగర అనిల్ కుమార్ చేతుల మీదుగా గుర్రాల శ్రీనివాస్ అవార్డును స్వీకరించారు. సభలో ఈ ఘట్టం ప్రత్యేక ఆకర్షణగా నిలిచింది. పలువురు ప్రముఖులు మాట్లాడుతూ, గ్రామీణ స్థాయి నుంచి మానవ హక్కుల పరిరక్షణ కోసం కృషి చేస్తున్న నాయకులకు ఇలాంటి అంతర్జాతీయ స్థాయి గుర్తింపులు రావడం సమాజానికి స్ఫూర్తిదాయకమని పేర్కొన్నారు.
గుర్రాల శ్రీనివాస్ గత అనేక సంవత్సరాలుగా దళితులు, బడుగు బలహీన వర్గాలు, అణగారిన సమాజాల సమస్యలపై నిరంతరం స్పందిస్తూ ప్రజల గొంతుకగా నిలుస్తున్నారు. సామాజిక అన్యాయం, వివక్ష, హక్కుల ఉల్లంఘనలపై ఆయన చేస్తున్న పోరాటం అనేక మంది బాధితులకు న్యాయం అందించే దిశగా కీలక పాత్ర పోషిస్తోందని సభలో పలువురు కొనియాడారు. గ్రామీణ ప్రాంతాల్లో రాజ్యాంగ చైతన్యం, సామాజిక అవగాహన పెంపొందించడంలో ఆయన పాత్ర విశేషమని అభిప్రాయపడ్డారు.
సమాజ సేవలో ఆయన చేస్తున్న విశిష్ట కృషికి గుర్తింపుగా ఇప్పటికే “దళిత రత్న అవార్డు”తో పాటు డాక్టర్ బి.ఆర్. అంబేద్కర్ జాతీయ అవార్డు (BSA) కూడా ఆయన అందుకున్నారు. భారత రాజ్యాంగ నిర్మాత డాక్టర్ బి.ఆర్. అంబేద్కర్ ఆశయాలను ఆదర్శంగా తీసుకుని సమానత్వ సమాజ నిర్మాణం కోసం ఆయన చేస్తున్న కృషిని సదస్సులో పాల్గొన్న పలువురు ప్రముఖులుప్రత్యేకంగాప్రశంసించారు.సదస్సులో జరిగిన చర్చల్లో మానవ హక్కుల పరిరక్షణ అనేది కేవలం బాధ్యత మాత్రమే కాకుండా ప్రజాస్వామ్య వ్యవస్థకు మూలస్తంభమని వక్తలు పేర్కొన్నారు. బలహీన వర్గాల పక్షాన నిలబడి వారి హక్కుల కోసం పోరాడే నాయకులను ప్రోత్సహించడం ద్వారా సమాజంలో మరింత చైతన్యం పెరుగుతుందనిఅభిప్రాయపడ్డారు.
అవార్డు స్వీకరించిన అనంతరం గుర్రాల శ్రీనివాస్ మాట్లాడుతూ,
“ఈ గౌరవం నా ఒక్కరికి సంబంధించినది కాదు. సమాజంలో న్యాయం కోసం, హక్కుల కోసం పోరాడుతున్న ప్రతి సామాన్యుడికి చెందిన గౌరవం ఇది. భవిష్యత్తులో కూడా రాజ్యాంగ పరిరక్షణ, మానవ హక్కుల సాధన, సామాజిక న్యాయం కోసం మరింత కట్టుబాటుతో పనిచేస్తాను” అని తెలిపారు.ఈ కార్యక్రమంలో పాల్గొన్న మానవ హక్కుల సంఘాల ప్రతినిధులు, సామాజిక కార్యకర్తలు, ప్రజాసంఘాల నాయకులు, అభిమానులు గుర్రాల శ్రీనివాస్‌కు హృదయపూర్వక అభినందనలు తెలియజేస్తూ, ఆయన భవిష్యత్తులో మరింత ఉన్నత స్థాయికి ఎదగాలని ఆకాంక్షించారు.