రోడ్డు భద్రత ప్రతి ఒక్కరి బాధ్యత

తిరుమలగిరి ట్రాఫిక్ విభాగం ఆధ్వర్యంలో బోయిన్‌పల్లి మార్కెట్‌లో అవగాహన సదస్సు

On 16 May 2026 10:06:36

సికింద్రాబాద్:

రహదారి నిబంధనలు పాటించడం ద్వారానే ప్రమాదాలను నివారించవచ్చని తిరుమలగిరి డివిజన్ ట్రాఫిక్ ఏసీపీ జి. శంకర్ రాజు పేర్కొన్నారు. నగర పోలీస్ కమిషనర్ బి. సుమతి, ట్రాఫిక్ డీసీపీ కె. రాహుల్ రెడ్డి ఆదేశాల మేరకు శుక్రవారం బోయిన్‌పల్లి మార్కెట్‌లో ట్రాఫిక్ అవగాహన కార్యక్రమం నిర్వహించారు. ఈ సందర్భంగా మార్కెట్ కమిటీ సభ్యులు, వాహనదారులు, డ్రైవర్లకు పలు సూచనలు చేశారు.

అలసత్వమే అనర్థం.. నిబంధనలే కవచం
ప్రయాణ సమయంలో చిన్నపాటి నిర్లక్ష్యం కుటుంబాలకు తీరని లోటును మిగిలిస్తుందని ఏసీపీ హెచ్చరించారు. డ్రైవింగ్ సమయంలో పాటించాల్సిన ముఖ్యమైన అంశాలను వివరించారు:
హెల్మెట్ ధారణ: ద్విచక్ర వాహనదారులు తప్పనిసరిగా హెల్మెట్ ధరించాలి.

మద్యం సేవించి డ్రైవింగ్: మద్యం మత్తులో వాహనం నడపడం ఆత్మహత్యతో సమానమని, దీన్ని విడనాడాలని సూచించారు.

*మైనర్ డ్రైవింగ్: పిల్లలకు వాహనాలు ఇచ్చే తల్లిదండ్రులపై కఠిన చర్యలు ఉంటాయని స్పష్టం చేశారు.

మొబైల్ వాడకం: డ్రైవింగ్ చేస్తూ ఫోన్ మాట్లాడటం వల్ల ఏకాగ్రత దెబ్బతిని ప్రమాదాలు జరుగుతున్నాయని తెలిపారు.

సీట్ బెల్ట్ & సిగ్నల్స్: కారు ప్రయాణంలో సీట్ బెల్ట్ ధరించాలని, ట్రాఫిక్ సిగ్నల్స్ ఎట్టి పరిస్థితుల్లోనూ ఉల్లంఘించకూడదని సూచించారు.

30 ఏళ్ల నిబద్ధతకు సత్కారం
ఈ కార్యక్రమంలో ఒక విశేషం చోటుచేసుకుంది. గత 30 ఏళ్లుగా ఎటువంటి ప్రమాదాలకు తావులేకుండా, క్రమశిక్షణతో ఆటో నడుపుతున్న డ్రైవర్ రమణయ్య ను పోలీసులు ప్రత్యేకంగా గుర్తించారు. ఆయన సురక్షిత డ్రైవింగ్ సేవలను కొనియాడుతూ అధికారులు ఆయన్ను ఘనంగా సన్మానించారు. బాధ్యతాయుతమైన డ్రైవింగ్‌కు రమణయ్య ఒక రోల్ మోడల్ అని ప్రశంసించారు.
ఈ కార్యక్రమంలో తిరుమలగిరి ట్రాఫిక్ ఇన్‌స్పెక్టర్ వి. సర్దార్ నాయక్, ఆర్ఐ ఐ.వి. రమణయ్య, ఎస్ఐలు మరియు మార్కెట్ ప్రతినిధులు పాల్గొన్నారు.