మామిడిపల్లి:
రంగారెడ్డి జిల్లా మహేశ్వరం మండలం మామిడిపల్లి గ్రామ పరిధిలోని చెరువులు, నాలాల ఆక్రమణలపై హైడ్రా (HYDRAA) కమిషనర్ రంగనాథ్ క్షేత్రస్థాయిలో పర్యటించారు. స్థానిక రైతులు, గ్రామస్థుల ఫిర్యాదు మేరకు గురువారం ఆయన అధికారులతో కలిసి వివాదాస్పద ప్రాంతాలను పరిశీలించారు.
కబ్జా కోరల్లో కుంటలు.. నీటి మళ్లింపుపై ఆగ్రహం
గ్రామంలోని *ఉంగరోని కుంట* అలుగు ఎత్తును నిబంధనలకు విరుద్ధంగా పెంచి, నీటి ప్రవాహాన్ని అడ్డుకుంటున్నారని బాధితులు కమిషనర్కు వివరించారు. ఎస్ఆర్ఆర్ ఏరోసిటీ కోవ్ (SRR Aerocity cove), పయనీర్ బిల్డర్స్ (Pioneer builders) వంటి సంస్థలు రియల్ ఎస్టేట్ వెంచర్ల కోసం నాలాలను ఆక్రమించి విల్లాల నిర్మాణం చేపడుతున్నాయని ఫిర్యాదులో పేర్కొన్నారు. అలుగు ఎత్తు పెంచడం వల్ల వర్షాకాలంలో నీరు వెనక్కి తన్ని చుట్టుపక్కల పంట పొలాలు మునిగిపోతున్నాయని రైతులు ఆవేదన వ్యక్తం చేశారు.
అక్రమ మట్టి నింపడంపై ఆందోళన:చెరువు కట్ట కింద ఎస్ఆర్ఆర్ (SRR), జీఎంఆర్ (GMR) సంస్థలు ఎటువంటి అనుమతులు లేకుండా పెద్ద ఎత్తున మట్టిని నింపుతున్నాయని గ్రామస్థులు తెలిపారు. దీనివల్ల కట్ట బలహీనపడి భవిష్యత్తులో గ్రామానికి ముప్పు వాటిల్లే ప్రమాదం ఉందని కమిషనర్ దృష్టికి తీసుకెళ్లారు. ఐఆర్ఏ శ్రీనిధి (IRA Sreenidhi), ఫినిక్స్ (Phoenix) సంస్థలు కూడా ఉంగరోని కుంట, కంకాయకుంట నాలాలను ఆక్రమించి నిర్మాణాలను కొనసాగిస్తున్నాయని పేర్కొన్నారు.
అధికారుల తీరుపై ఫిర్యాదు:గతంలో ఈ అక్రమాలపై ఇరిగేషన్, రెవెన్యూ అధికారులకు ఫిర్యాదు చేసినా ఫలితం లేకపోయిందని బాధితులు ఆరోపించారు.
* తప్పుడు సమాచారం ఇచ్చారనే ఆరోపణలతో ఇరిగేషన్ డీఈ (DE) జగదీష్, ఏఈఈ (AEE) గంగరాజుపై చర్యలు తీసుకోవాలని కోరారు.
* విధుల్లో నిర్లక్ష్యం వహించిన బాలాపూర్ తహసీల్దార్ (MRO) ఇందిరాదేవిపై కూడా బాధ్యత ఖరారు చేయాలని విన్నవించారు.
త్వరితగతిన చర్యలు తీసుకుంటాం: రంగనాథ్
ఫిర్యాదులను స్వీకరించిన కమిషనర్ రంగనాథ్.. క్షేత్రస్థాయి పరిస్థితులను సమీక్షించారు. నిబంధనల అతిక్రమణ జరిగినట్లు తేలితే ఎంతటి వారైనా ఉపేక్షించేది లేదని స్పష్టం చేశారు. అక్రమ నిర్మాణాలపై తక్షణమే విచారణ జరిపి నివేదిక సమర్పించాలని అధికారులను ఆదేశించారు. ఈ కార్యక్రమంలో హైడ్రా ఏసీపీ త్రిలేశ్వర రావు, ఎస్ఐ ముజఫర్ మరియు ఇతర సిబ్బంది పాల్గొన్నారు.
About The Author
.jpeg)
