బాధితురాలి వివరాలు వెల్లడిస్తే కఠిన చర్యలు

బేగంపేట ఘటనపై మల్కాజిగిరి డీసీపీ హెచ్చరిక

On 10 Apr 2026 16:27:19

బాధితురాలి వివరాలు వెల్లడిస్తే కఠిన చర్యలు

హైదరాబాద్:

బేగంపేటలో ట్రైనీ పైలట్‌పై జరిగిన లైంగిక దాడి కేసులో బాధితురాలి గుర్తింపును బయటపెట్టేలా వ్యవహరిస్తే చట్టపరమైన చర్యలు తీసుకుంటామని మల్కాజిగిరి డీసీపీ సి.హెచ్. శ్రీధర్ హెచ్చరించారు. ఈ కేసు దర్యాప్తులో ఉందని, బాధితురాలికి సంబంధించి తప్పుదోవ పట్టించే సమాచారాన్ని సోషల్ మీడియాలో ప్రచారం చేయడంపై ఆయన సీరియస్ అయ్యారు.

వివరాలు వెల్లడించడం నేరం
బాధితురాలి పేరు, ఆమె కుటుంబ సభ్యుల వివరాలు, నివాస స్థలం లేదా ఆమె పనిచేసే/చదువుకునే సంస్థల పేర్లను ప్రత్యక్షంగా గానీ, పరోక్షంగా గానీ వెల్లడించడం శిక్షార్హమైన నేరమని డీసీపీ స్పష్టం చేశారు.

* *BNS సెక్షన్ 72:* భారతీయ న్యాయ సంహిత (గతంలో IPC 228A) ప్రకారం బాధితురాలి గుర్తింపు వెల్లడించడం చట్ట విరుద్ధం.
* *సుప్రీంకోర్టు తీర్పు:* నిపుణ్ సక్సేనా వర్సెస్ యూనియన్ ఆఫ్ ఇండియా కేసులో సుప్రీంకోర్టు ఇచ్చిన తీర్పు ప్రకారం.. బాధితురాలి వ్యక్తిగత వివరాలను గోప్యంగా ఉంచడం తప్పనిసరి.

సోషల్ మీడియాకు వార్నింగ్
యూట్యూబ్ ఛానెళ్లు, డిజిటల్ ప్లాట్‌ఫారమ్‌లు బాధితురాలి ప్రైవసీకి భంగం కలిగించేలా వార్తలు రాయవద్దని పోలీసులు సూచించారు.

* ఇప్పటికే అప్‌లోడ్ చేసిన అభ్యంతరకర పోస్టులు, వీడియోలను వెంటనే తొలగించాలి.

* ధృవీకరించని సమాచారం, ఊహాగానాలను షేర్ చేస్తే దర్యాప్తుకు ఆటంకం కలిగించినట్లుగా పరిగణిస్తాం.

* బాధితురాలి గుర్తింపు బయటపడేలా ఉన్న పరోక్ష సమాచారాన్ని కూడా నివారించాలి.
బాధ్యతాయుతమైన రిపోర్టింగ్ చేయాలని, చట్ట నిబంధనలను ఉల్లంఘించే వారిపై కఠినంగా వ్యవహరిస్తామని డీసీపీ ఒక ప్రకటనలో తెలిపారు.