*హైదరాబాద్:
తెలంగాణ రాజకీయాల్లో సరికొత్త అధ్యాయం మొదలుకానుంది. కల్వకుంట్ల కవిత నాయకత్వంలో ఆవిర్భవించనున్న నూతన రాజకీయ పార్టీలోకి తెలంగాణ బీసీ సంక్షేమ సంఘం రాష్ట్ర అధ్యక్షుడు అల్లంపల్లి రామకోటి చేరారు. ఈ సందర్భంగా ఆయన రాష్ట్ర ప్రజలకు శుభాకాంక్షలు తెలియజేశారు. మహిళా పక్షపాతిగా, బీసీల గొంతుకగా నిలిచేందుకే కవితమ్మ ఈ సాహసోపేత నిర్ణయం తీసుకున్నారని ఆయన కొనియాడారు.

ఉద్యమాల గడ్డపై కొత్త నినాదం
విద్యార్థుల చదువులు, నిరుద్యోగుల కొలువులు, కన్నీళ్లు లేని రైతు రాజ్యం కోసం నూతన పార్టీ పురుడుపోసుకుంటోందని రామకోటి పేర్కొన్నారు. ఈ నెల 25వ తేదీన జరగనున్న పార్టీ ఆవిర్భావ సభకు తెలంగాణ ప్రజలు, బీసీలు, మహిళలు భారీ సంఖ్యలో తరలివచ్చి విజయవంతం చేయాలని ఆయన పిలుపునిచ్చారు.

మూడు దశాబ్దాల పోరాటాల గుర్తింపు
గత 30 ఏళ్లుగా నీతి, నిజాయితీతో అల్లంపల్లి రామకోటి చేసిన పోరాటాలను గుర్తించి కవితమ్మ ఆయనను పార్టీలోకి ఆహ్వానించారు. బీసీ విద్యార్థుల స్కాలర్‌షిప్‌లు, ఫీజు రీయింబర్స్‌మెంట్ కోసం ఆయన అనేక ధర్నాలు, రాస్తారోకోలు నిర్వహించారు.
 * చట్టసభల్లో బీసీలకు 50% రిజర్వేషన్లు కల్పించాలి.
 * పార్లమెంట్‌లో వెంటనే బీసీ బిల్లు ప్రవేశపెట్టాలి.
 * కేంద్రంలో బీసీలకు ప్రత్యేక మంత్రిత్వ శాఖను ఏర్పాటు చేయాలి.
 * స్థానిక సంస్థల్లో జనాభా దామాషా ప్రకారం రిజర్వేషన్లు ఉండాలి.
వంటి ప్రధాన డిమాండ్లతో అసెంబ్లీ, పార్లమెంట్ ముట్టడి కార్యక్రమాల్లో రామకోటి చురుగ్గా పాల్గొన్నారు.