ఉమ్మడి అదిలాబాద్ జిల్లా బ్యూరో (భారత శక్తి) జూలై 31:

నిర్మల్ జిల్లా భైంసా మండలo దేగాం గ్రామంలో బస్టాండ్ ముందర హైవే రోడ్డు పక్కనే ఉన్న రోడ్డున వెళ్లే ఎంతోమంది దానిని చూసి ఇంకా కూల్చలేదే అని చెప్తున్నారు. మొన్ననే కుబీర్ మండల కుప్టి గ్రామంలో ప్రభుత్వ పాఠశాల భవనం కూలి నలుగురు విద్యార్థులు గాయాలపాలయ్యారు. అయినా కూడా అధికారులలో చలనం రావడం లేదు. స్పష్టంగా రాష్ట్ర ప్రభుత్వం స్పష్టమైన ఆదేశాలు జారీ చేసినప్పటికీ, కాలం చెల్లిన పాత ఇళ్లను కూల్చివేయడంలో సంబంధిత అధికారులు నిర్లక్ష్యంగా వ్యవహరిస్తున్న వైనం బయటపడింది. భైంసా మండలంలోని దేగాం గ్రామంలో ఈ పరిస్థితి స్పష్టంగా కనిపిస్తోంది. స్థానికంగా అనేక పాత ఇండ్లు ప్రమాదకర స్థితిలో ఉన్నా, అధికారులు చర్యలు తీసుకోవడంలో వెనుకడుగు వేస్తున్నారు.
ప్రభుత్వం తరపున మున్సిపల్, రెవెన్యూ శాఖలు ఉమ్మడిగా చట్టపరమైన ప్రక్రియ ద్వారా పాత, ప్రమాదకర నిర్మాణాలను తొలగించాల్సిన బాధ్యత ఉన్నా, ఇప్పటివరకు ఎలాంటి చర్యలు తీసుకోలేదని గ్రామస్థులు వాపోతున్నారు. ఈ విషయంలో మండల ఎంపీడీవో, ఎమ్మార్వో లాంటి కీలక అధికారులు స్థానిక పరిస్థితిని చూసి కూడా చూస్తోన్నట్టే వదిలేస్తున్నారని ప్రజలు ఆరోపిస్తున్నారు.

దేగాం గ్రామంలో ఓ పాత ఇల్లు పూర్తిగా వినియోగానికి నిస్సారమైన స్థితిలో ఉన్నా, ఇప్పటివరకు కూల్చివేత జరగలేదు. వర్షాకాలంలో ఇలాంటి నిర్మాణాలు మరింత ప్రమాదానికి గురిచేయవచ్చని నిపుణులు హెచ్చరిస్తున్నారు. గ్రామంలోని ఓ వృద్ధ మహిళ మాట్లాడుతూ, “పక్కనే ఉన్న పాత ఇల్లు ఏ మినిట్లో అయినా కూలిపోవచ్చు. పిల్లలు బయట ఆడుకోవాలన్నా భయంగా ఉంది. అధికారులు ఎన్నిసార్లు చెప్పినా ఎవరూ పట్టించుకోవడం లేదు” అని ఆవేదన వ్యక్తం చేసింది.
ప్రజల శ్రేయస్సు కోసం తీసుకోవాల్సిన అత్యవసర చర్యలపైనా ప్రభుత్వం ఇప్పటికే స్పష్టమైన మార్గదర్శకాలు ఇచ్చినప్పటికీ, ఫీల్డ్ స్థాయిలో ఆదేశాల అమలు లేకుండా పోతోంది. స్థానిక నాయకులు, ప్రజాప్రతినిధులు ఈ విషయంపై స్పందించి వెంటనే చర్యలు తీసుకునేలా సంబంధిత అధికారులపై ఒత్తిడి తీసుకురావాలని గ్రామస్తులు డిమాండ్ చేస్తున్నారు.
ఈ తరహా నిర్లక్ష్యం కొనసాగితే, రానున్న రోజుల్లో ఊహించని ప్రమాదాలు సంభవించే అవకాశం ఉందని హెచ్చరిస్తున్నారు.