చదువుల తల్లి సరస్వతి కొలువై ఉండే  పాఠశాలల పరిస్థితి ప్రమాదభరితంగా మారిపోయాయి.. కేవలం అక్రమార్జనే ప్రధాన ధ్యేయంగా సాగుతున్న ప్రైవేట్ పాఠశాలలు  విద్యార్థుల రక్షణకోసం ఎలాంటి జాగ్రత్తలు తీసుకుంటున్న దాఖలాలు కనిపించడం లేదు.. కనీస వసతులు కూడా లేకుండా పాఠశాలలను  నడిపిస్తుండటం ఆందోళన కలిగించే విషయం.. కొందరు తల్లి దండ్రులు పాఠశాలల యాజమాన్యాలను ప్రశ్నిస్తున్నా సరైన జవాబు చెప్పేవారు  కనిపించడం లేదు.. ఫిర్యాదు చేస్తే ఆ ఫిర్యాదులను బుట్టదాఖలు చేస్తున్నారు అవినీతి అధికారులు..  ఇటు ప్రభుత్వ పాఠశాలలకు తమ పిల్లలను పంపించలేక, తప్పని పరిస్థితుల్లో ప్రైవేట్ పాఠశాలలను ఆశ్రయిస్తున్నారు తల్లి దండ్రులు..  వేలల్లో జీతాలు తీసుకుంటూ ప్రభుత్వ ఉపాధ్యాయులు పిల్లల భవిష్యత్తును పట్టించుకోకపోవడంతో.. ప్రైవేట్ పాఠశాలలకు పంపించక తప్పదనే  అభిప్రాయాన్ని పలువురు వ్యక్తం చేస్తున్నారు.. ఈ పరిస్థితుల్లో మార్పు తేవడం కోసం  అహర్నిశలు శ్రమిస్తున్నారు.. అనేక పోరాటాలు చేస్తున్నారు " తెలంగాణ స్కూల్స్ టెక్నికల్ కాలేజెస్ ఎంప్లాయిస్ అసోసియేషన్ 
"ఫోరం ఫర్ యాంటీ కరప్షన్ అండ్ వుమన్ రైట్స్ సంస్థలు"..  

( స్పెషల్ కరస్పాండెంట్)హైదరాబాద్: పిల్లలను స్కూళ్లకు ఎందుకు పంపుతాం.. వారి భవిష్యత్తు బాగుండాలనే కదా..? కానీ భవిష్యత్తు మాటేమో గానీ ప్రస్తుత పరిస్థితుల్లో కొన్ని ప్రైవేట్ పాఠశాలల నిర్వహణ మాత్రం ఎంతో ఆందోళన కలిగిస్తోంది.. తెలంగాణ రాష్ట్ర వ్యాప్తంగా కొన్ని వేల ప్రైవేట్ పాఠశాలలు నడుస్తున్నాయి..  ప్రైవేట్ పాఠశాలకు మేము వ్యతిరేకం కాదు.. కానీ నియమ నిబంధనలు పాటించని పాఠశాలలపైనే మా పోరాటం.. 80 శాతం ప్రైవేట్ పాఠశాలల్లో కనీస వసతులు లేకపోవడం అన్నది ఇప్పుడు కళ్ళముందు కనిపిస్తున్న వాస్తవం.. ప్రభుత్వ నిబంధనల ప్రకారం విశాలమైన తరగతి గదులు ఉండాలి..  సరైన ఆటస్థలం ఉండాలి.. అదే విధంగా పరిశుభ్రమైన వాష్ రూమ్స్ తప్పని సరిగా ఉండాలి..  పరిమిత సంఖ్యలో పాఠశాల అంతస్తులు ఉండాలి.. మరీ ముఖ్యంగా ఫైర్ సేఫ్టీ నిబంధనలు పాటించాలి.. 

కానీ ఇవన్నీ కూడా లేకుండా ఎన్నెన్నో ప్రైవేట్ పాఠశాలలు నడుస్తుండటం గమనార్హం.. అంతేకాకుండా ఒక లెక్కంటూ లేకుండా విద్యార్థులను చేర్చుకుంటున్నారు..  ఒక్కో తరగతి గదిలో కూర్చోవడానికి వీలులేనంత మందిని కుక్కి చదువులు చెబుతున్నారు.. ఇలాంటి పరిస్థితుల్లో  పిల్లలు ఏవిధంగా చదువు నేర్చుకుంటారు.. అత్యవసర పరిస్థితుల్లో వాష్ రూమ్స్ కి వెళ్లాల్సి వస్తే ఇక నరకమే.. మరీ ముఖ్యంగా బాలికల  పరిస్థితి అగమ్యగోచరంగా ఉంటోంది.. ఇక ఏదైనా అనుకోకుండా అగ్ని ప్రమాదం జరిగితే తప్పించుకోవడానికి కూడా వీలు  పాఠశాలల నిర్వహణ ఉంటోంది..  మరి విద్యాశాఖ అధికారులు ఏమి చేస్తున్నారు అన్నది అర్ధం కానీ దుస్థితి నెలకొంది.. లంచాలు తీసుకుంటూ ఇలాంటి పాఠశాలలను చూసీ చూడనట్లు వదిలేస్తున్నారు అన్నది పచ్చి నిజం.. ఎలాంటి నిబంధనలు పాటించని స్కూళ్లకు కూడా  అన్నీ సక్రమంగా ఉన్నాయంటూ సర్టిఫికెట్లు జారీ చేస్తున్నారు.. ఇక అగ్నిమాపక శాఖ అధికారులైతే మరో అడుగు ముందుకు వేసి..  ఫైర్ సేఫ్టీ నిబంధనలు ఖచ్చితంగా ఉన్నాయంటూ ఎన్.ఓ.సి. లు జారీ చేస్తున్నారు.. ఇది ఎంత ప్రమాదకరమో ఆలోచించాలి..  

మరి కొన్ని స్కూళ్ళు ఒక చోట ఫైర్ సేఫ్టీ సర్టిఫికెట్  తీసుకుని, మరోచోట వేరొక బిల్డింగ్ లో పాఠశాలల నిర్వహణ కొనసాగిస్తున్నారు.. ఇలాంటి ఉదంతాలు ఎన్నో బయటపడ్డాయి..  కానీ అధికారుల్లో గానీ, పాఠశాలల యాజమాన్యాలలో గానీ మార్పు రావడం లేదు.. పిల్లల భవిష్యత్తును ప్రమాదంలోకి నెట్టేస్తూనే ఉన్నారు.. మరీ దారుణం ఏమిటంటే ఒక పేరుమీద స్కూళ్లకు పర్మిషన్ తీసుకుంటూ, మరో పేరుమీద స్కూళ్ళు  నడుపుతున్నారు.. పేరున్న స్కూళ్ల రిసిప్ట్ లు ఇస్తూ చిన్నా చితకా స్కూళ్లను నడుపుతున్నారు.. ఎలాంటి అనుభవం, అర్హత లేనివాళ్లను టీచర్లుగా నియమించుకుంటున్నారు.. అర్హత, అనుభవం ఉంటే ఎక్కువ జీతాలు చెల్లించాల్సి వస్తుందని ఈ విధంగా కక్కుర్తి పడుతున్నారు  పాఠశాలల యాజమాన్యాలు.. వీరిని నియంత్రించాల్సిన ప్రభుత్వాలు, అధికారులు వారికే దాసోహం అంటున్నారు..  విద్యను వ్యాపారంగా మార్చేస్తున్నారు.. భవిష్యత్ తరాలను బుగ్గిపాలు చేస్తున్నారు.. 

జిల్లా విద్యాశాఖాధికారి మొదలు కుని, క్రిందిస్థాయి ఉద్యోగులందరూ అవినీతిలో కూరుకుని పోయారు.. ఇబ్బడి ముబ్బడిగా పర్మిషన్లు ఇస్తూ  రెండు చేతులా సంపాదిస్తున్నారు.. విద్యాశాఖ అనేది నిర్వీర్యంగా మారిపోయింది.. కార్పొరేట్లకు అమ్ముడుపోయింది.. ప్రభుత్వ పాఠశాలలు  సక్రమంగా ఉంటే ఇలాంటి దుస్థితి ఎదురయ్యేది కాదని పిల్లల తల్లిదండ్రులు వాపోతున్నారు.. 

ప్రైవేట్ పాఠశాలల నియంత్రించేందుకు సంయుక్తంగా " తెలంగాణ స్కూల్స్ టెక్నికల్ కాలేజెస్ ఎంప్లాయిస్ అసోసియేషన్ ", 
"ఫోరం ఫర్ యాంటీ కరప్షన్ అండ్ వుమన్ రైట్స్ సంస్థలు" పోరాటం చేస్తున్నాయి.. మీరూ చేతులు కలపండి పిల్లల భవిష్యత్తును తీర్చి దిద్దుదాం..